阻住人打機真係乞人憎到裂

螢幕截圖 2016-04-13 15.10.13

 

話說今日高登出咗個咁既 Po,睇完我真係非常之咁 Agger!細細個阿媽就好鐘意趁我同阿哥打緊機果陣係電視前面行黎行去,叫你做呢樣果樣,但係打機之前又唔叫你做架啵!到大個啲,搬咗個壇入自己房啦,咁戰場就好自自然然會搬埋入房,你以為咁樣可以避開阿媽既攻擊?少年你真係太年輕了,Lock咗門就發動100連發敲門大技;無Lock門既話就會直接入黎同你玩白兵戰!

咁阿媽都算啦,再大過少少識咗女友就係咁煩話你掛住打機唔理佢阿,一係就上埋黎用充滿住不滿既眼神〝陪〞你打機(好在而家已經無呢個問題,Yeah!)。面對住阿媽加女友既雙重攻擊想自己打 RPG Game都難,莫講話約埋成班 Fd返屋企玩下孖寶賽車過類啦!

我敢講,阻住人打機既真係完全無夢想,無抱負架!佢唔明白當我地打緊機既時候面對既,並唔係一個遊戲,而係肩負緊好重要既責任。例如玩聖劍傳說咁,我地係肩負緊保護世界既責任;玩 Sim City我地係為咗令到個城市更美好,市民生活得更好而努力 (咁當然有人係為咗整臭隔離個城既)。玩 Rainbow 6 我地係要打擊恐怖分子;就算玩街霸,我地都係為咗同對方作出一場神聖既對決而企係度架!你幾時有睇過西部牛仔片2條友互射果陣,會有把聲叫你落街買鹽?

R6S_Screenshot_33_225836

所以早排接受訪問果陣我都話,電競呢樣野係香港並未係好受社會大眾接受其中一個原因,係好多人忘記咗咩叫夢,你打機只係因為你打機,廢青,並唔係因為你想係另一個世界發夢,甚至將2次元既夢變為現實中既夢想黎追逐,所以講到尾,真係唔好再阻住人打機啦……會生仔無屎忽架!

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章