其實暴雪娛樂 (Blizzard Entertainment) 真係好犀利

古語有云︰「暴雪出品，必屬佳品。」，
雖然呢句說話去到今時今日仲適唔適用我唔敢講，
但係講到掀起潮流、創造風潮方面，佢地真係無人能及。

雖然暴雪嘅遊戲係平衡性，遊戲性方面一直都為人垢病，
但係由佢地所創造嘅內容﹔小至角色特性、人物關係，大至故事情節、世界觀念，都有著毒品般嘅吸引力。

WoW中，龐大嘅故事基礎，每一處都令人想一探究竟：

充滿混亂與暴力，崇尚力量嘅部落；

好似係正義嘅使者，不過都只係扮曬有原則咁殺戮嘅聯盟。
明明只係遊戲中嘅陣營，但係卻可以令玩家建立起「忠誠」與「崇拜」。

Starcraft中，角色關係輪迴交錯，每一位都有獨特嘅吸引力：
勇武抗爭，推翻暴政嘅Jim Raynor；

本為人類特務，後卻統領蟲族嘅萬人迷Kerrigan；

一直存在感皆無，充滿正義毒撚風格嘅Artanis。
藉由故事嘅輔助，即使遊戲本身極難上手，但係角色卻依然深入民心。

而最近先完成公測，過多個幾禮拜先會真正推出，
推動我寫呢篇嘢，各位人兄無玩都肯定知道嘅Overwatch -《鬥陣特攻》。
當中嘅角色各有迷人之處，世上其他同類型角色未必畀到你嘅獨特感覺。

弓手、忍者，周街都係。但係一般會令人覺得MK、中二嘅特性由暴雪去創造嘅源氏同半藏身上就變咗型棍。

狙擊手，又係周街都有。但係係冷靜嘅思維之外，Widowmaker充滿危險氣息嘅眼神，出奇地吸引嘅法國口音，加上佢套殺死人嘅緊身衣，令本來平淡無奇嘅狙擊手充滿特色。

把聲好J到不得了，帶著性感小屁股嘅Tracer；

你永遠都估唔到科學家特性竟然可以放係一隻屌那猩身上嘅Winston；

笑容充滿住知性美，每個遊戲都少不了嘅補師Mercy；

主題鮮明，MK氣息濃厚嘅西部牛仔McCree等等等等。

真係無乜遊戲廠商可以咁有效咁建立起深入民心嘅角色，就算主題一樣都會令你覺得有唔同，
但係暴雪就係有辦法創造潮流，為佢地嘅角色注入靈魂。
遊戲都仲未真正推出，就已經有極大量嘅二次創作更可以證明暴雪係呢方面真係好成功。
同人圖，同人漫畫，甚至連A片都可以係咁多遊戲中突圍而出，真係唔寫個服字畀你都唔得……

唔信你睇下咸網PornHub