《Pokémon天梯入門》烈日晴空-No.006噴火龍Y

上次話普通而強大嘅袋獸係天梯賽及格線(其實玩得深入嘅話,袋獸係可以因應普通強大呢點,去做補位)。咁今次要介紹嘅噴火龍Y,就係因著主題鮮明而位於使用榜第4位。

 

No.006 噴火龍(Y),天梯賽嘅烈日晴空。006-1 006-2

噴火龍Y,火系/飛行系Pokemon,一隻所有Pokemon Fans都唔會陌生嘅Pokemon;亦係少數唯二得到厚愛而有兩種唔同MEGA進化嘅Pokemon。MEGA進化後嘅噴火龍Y,特攻大幅度提升+50至159嘅極高水平,特防+30去到一般雷系可以硬接一次,攻擊為無甚意義嘅+20,速度維持喺一般中上速度嘅100;特性變成 乾旱(ひでり Drought):天氣轉變為晴天,為時5回合。MEGA特性為噴火龍Y帶入一個絕對優勢嘅天氣裡面;晴天:火屬性招式威力1.5倍,水屬性減半;並為隊伍嘅構成放入咗一個核心主題,晴天。

根據統計(除變化技外,一律扣除噴火龍X嘅13.3%),

招式:

88.3%會用 陽光烈焰(ソーラービーム Solar Beam):草系特攻招式;120威力;100命中;首回合儲氣,次回合攻擊。晴天時,首回合攻擊,雨天、雪雹、風沙中威力減半。

84.3%嘅會用 熱風(ねっぷう Heat Wave):火系嘅特攻招式;95威力;90命中;敵全體攻擊;10%使對象燃燒。

55.5%會用 保護(まもる Protect):普通系變化招式;--威力;--命中;先制+4;抵擋一回合攻擊及變化招式;連續使用成功率會逐次減半。

34.2% 會用 空氣切割(エアスラッシュ Air Slice):飛行系特攻招式;75威力;95命中;30%使對像膽怯。

27.9%用 火炎噴射(かえんほうしゃ Flamethrower):火系特攻招式;90威力;100命中;10%使對象燃燒。

以上為最標準嘅5招,其他嘅常見招式仲有氣魄彈(きあいだま Focus Blast)、龍之波動(りゅうのはどう Dragon Pulse),作為一啲額外嘅打擊面補充招式。

 

裝備:

84.2%為噴火龍石Y;13.3%為噴火龍石X。

 

特性:

由於特性猛火及太陽之力都係無辦法發動嘅⋯所以不論X定Y,MEGA前嘅特性都係無意思。

 

點解只係寫4招,而唔係好似袋獸咁寫5招甚至6招?因為噴火龍Y真係得標準配招㗎咋,其要變化嘅反而係隊伍嘅組合。不過我哋都要先講下呢4招。

陽光烈焰(ソーラービーム Solar Beam):

MEGA後就會立即進入晴天,基本上係唔需要儲氣嘅120威力草系招式。草系招式係可以將剋制火系嘅水、岩、地全部反制晒,對於噴火龍Y本身嚟講係一招唔可以無嘅招式。但用呢招有一啲地方要注意,就係必需要係晴天,萬一天氣被改變,Y噴就會儲氣,亦唔可以換出,喺次回合射一炮只有60威力嘅陽光烈焰,即刻變成一塊定靶。有幾種被改變天氣嘅情況要特別小心:第一、對方有 惡作劇之心(いたずらごころ Prankster)或速度快過噴火龍嘅Pokemon使用天氣招式;第二、喺噴火龍MEGA後,對方再換入帶有天氣特性嘅Pokemon。第一種情況係避無可避,基本上晴天就相當於封印咗,專心用其他招式攻擊或換出好過。第二種情況,係喺你MEGA過後先要留意,如果你喺呢個回合MEGA,對方換入會比你MEGA進化較先發生,喺你MEGA後就會發動乾旱將天氣覆寫成晴天,所以喺你MEGA嘅回合,你係唔需要理對方後排有無天氣特性嘅Pokemon。

 

熱風(ねっぷう Heat Wave)/火炎噴射(かえんほうしゃ Flamethrower):

2v2有翼或火系嘅都會裝咁濟⋯火系嘅範圍特攻招式,只係命中90會有可能有小意外。乘返敵方範圍攻擊嘅2/3傷害修正,喺晴天下,熱風嘅142.5威力夠用嚟清場用㗎啦。唯獨要留意對方嘅廣域防禦(ワイドガード Wide Guard)會將範圍技無效化,有部份玩家會改以火炎噴射代替熱風嚟防止被廣域防禦無效化。不過喺2v2嘅賽事中,如果單體攻擊而又無特別提升防三角的話,Y噴好容易喺作出足夠嘅傷害前,被旁邊嗰隻殺死,所以一般仍然會係用熱風。

 

空氣切割(エアスラッシュ Air Slice):

本系招式二,飛行系特攻招式。呢招命中後,有30%令對方膽怯。以噴火龍唔算慢嘅速度,絕對可以賭運氣搏膽怯。其次當遇上有廣域防禦嘅局面,亦可以作為熱風以外嘅攻擊手段。飛行系招式對於已經有草系同火系招式嘅噴火龍Y嚟講,打擊面只係增加對格鬥系2倍、對龍系1倍,唔算增加好多,所以呢招都係視作突破廣域防禦加膽怯嘅手段。

 

保護(まもる Protect):

用途只有一個,喺有危險時,擋一個回合。通常係喺見到岩系招式,岩系使用者面前。始終Y噴有岩4倍嘅致命傷在。

 

***其他招式:

氣魄彈(きあいだま Focus Blast):

格鬥系特攻招式;120威力;70命中;10%使對象特防下降1級。

 

龍之波動(りゅうのはどう Dragon Pulse):

龍系特攻招式;85威力;100命中。

 

上述兩招都係用嚟按打擊面所需而決定用定唔用,好多時都係讓出保護嘅招式位。格鬥系嘅氣魄彈可以用嚟特別剋制係岩系、惡系、普通系以及專門對付席多藍恩(ヒードラン Heatran)嘅,不過得70命中,落唔落自己衡量。龍之波動就係用嚟打龍系嘅,不過其實用空氣切割已足夠。

 

講噴火龍(Y),唔可以只係講佢嘅單獨配招同點用,因為正如文首所講,有噴火龍(Y)嘅隊伍必然係主題鮮明嘅晴天隊。所以我接落嚟都會講一啲常見嘅隊友配塔。

No.003 奇異花(フシギバナ Venusaur):

14163617_10154063514317968_1310746865_o

草系/毒系;特性:葉綠素(ようりょくそ Chlorophyll):晴天之下,速度兩倍。

晴天下嘅高速,加上本身唔錯嘅防三角,可以喺晴天隊作出優秀嘅發揮。奇異花有催眠粉末(ねむりごな Sleep Powder):草系變化招式;75命中;使對象陷入睡眠。可以利用高速催眠,將威脅無力化。另外草系/毒系本身亦都同噴火龍組成咗一個優秀嘅屬性聯防,組合起嚟能夠同時剋制水、岩、地面、草、虫、冰、格、鋼鐵、妖精,對龍、惡行、火、超能力、幽靈等亦有一倍嘅基礎傷害。但唯獨對火/鋼嘅席多藍恩(ヒードラン Heatran)會出現火、草、毒、飛、龍都無法造成傷有效傷害,所以部份以奇異花配噴火龍(Y)作為首發陣容嘅玩家,會將草系攻擊嘅責任留返畀奇異花,而噴火龍會以氣魄彈取代陽光烈焰。由於氣魄彈嘅命中率相當唔穩定,所以唔少玩家會於同時間向席多藍恩放催眠粉末,以確保奇異花嘅安全。

 

No.645 土捲雲(ランドロス Landorus)(靈獸):

1a874ff4

地面系/飛行系;特性:威嚇(いかく Intimidate):對方場中Pokemon攻擊力下降1級。

本身都係一隻相當熱門嘅Pokemon。由於極高嘅物攻,平均水平嘅防三角同速度,配合速度領巾(1.5倍速度,但只能使用出場後第一次使用招式)、突擊背心(不能使用變化招式,防禦及特防1.5倍)。而地面系嘅佢,可以幫噴火龍處理咗4倍弱點嘅岩系,同埋上面提到極其麻煩嘅席多藍恩。同時間,即使係全體攻擊嘅地震都唔會傷到飛行系嘅噴火龍。而噴火龍(Y)本身嘅火系能夠幫土捲雲打擊冰系(4倍弱點),晴天能夠削弱水系對土捲雲嘅傷害,土捲雲得到噴火龍(Y)嘅全面掩護。從屬性聯防嚟講可以話係完美,不過要小心對方持有廣域防禦,因為地震、熱風、岩崩都係範圍攻擊,隨時會被封印攻擊手段而觸樵。

 

No.122吸盤小丑(新譯叫魔墻人偶,你望下佢啲配招同日文名就明)(バリヤード Mr. Mime):

20131231210614

超能力系/妖精系;特性:過濾(フィルター Fliter):受到剋制屬性攻擊時,傷害減少1/4。

同上面土捲雲相反,傾向全面支援噴火龍。由於噴火龍怕岩,而2v2中常見嘅岩系招式為範圍攻擊嘅岩崩(いわなだれ Rock Slide):岩系物攻招式;75威力;90命中;敵全體範圍攻擊;命中後,30%使對象膽怯;所以用上吸盤小丑嘅廣域防禦去扺擋。而龍系對火/草嘅防禦能力,可以利用妖精系招式協助突破,從而等噴火龍專心使用熱風清場。而除咗廣域防禦同妖精系攻擊招式外,吸盤小丑仲可以有下馬威(上次袋獸,先制+3、100%膽怯嗰招呢)同埋欺詐空間(トリックルーム Trick Room):後制-7;5回合內,行動次序倒轉為速度愈慢愈優先。下馬威嘅支援能力,係無容置疑,只要將有威脅嘅對象截停一個回合,噴火龍Y絕對夠能力將對方擊倒。而欺詐空間,驟眼睇係一個唔多配合速度種族值有100噴火龍嘅選擇。但係當噴火龍Y同吸盤小丑打完第一波攻擊後,換入如No.103椰樹獸、No.709朽木妖、No.357 熱帶龍等晴天欺空嘅攻擊手。首發打高速/中速,後排打欺空,我哋稱之為半欺空。半欺空嘅優點,就係面對速度比你慢嘅隊伍時,你可以用首發陣壓制;相反,遇上高速型嘅嘅隊伍(如順風隊)就可以改用後排欺空嚟反制。當然,如果使用欺空同換入後排嘅時機,就要睇經驗(係,最後都係經驗同直覺)。

 

雖然上面啲屬性聯防中,都講咗好多對付噴火龍(Y)嘅弱點,但循例都指返出嚟有關面對噴火龍(Y)嘅對策。

 

對策一,物理岩攻。噴火龍Y有岩4倍嘅個致命弱點,同時間佢嘅防禦唔高。岩崩、投石、石刃,各種岩石系嘅物理攻擊都有機會做到確一。唯獨要注意嘅係,假如對方有刻意將努力值,由速度週去HP或防禦,就有機會因應攻擊力不足而無法確一,特別係無屬修嘅非岩系Pokemon。要留意嘅係,使用岩崩時,噴火龍Y身邊有無廣域防禦嘅使用者。

 

對策二,天氣切換。如果你本身都係玩晴天以外嘅天氣隊,你就要睇下你會唔會有誘使噴火龍Y使出陽光烈焰嘅機會,同時間於噴火龍Y攻擊前切換天氣。如果噴火龍未MEGA,只有速度比佢快或者有惡作劇之心嘅Pokemon使用天氣招式先做得到。咁如果無咁點呢?可以用下馬威或保護等技巧去等佢MEGA,之後再喺次回合換入特性會改變天氣嘅Pokemon。咁樣使用陽光烈焰嘅噴火龍Y,就會進入兩個回合任人打嘅狀態。當然呢個位係要靠雙方邊個先讀強。

 

對策三,席多藍恩。火系/鋼系;特性:延燒(もらいび Flash Fire):受到火系招式攻擊不會受傷,同時自身火系招式威力1.5倍。火系無效、草系1/4、飛行系及龍系1/2,氣魄彈命中率低,所有噴火龍嘅攻擊手段都受到制肘。試下裝上氣球,小心唔好被屬性聯防嘅地系招式打到,就可以對耗。席多藍恩面對噴火龍嘅問題係,同樣地缺乏攻擊手段,不過借助天晴,同埋延燒嘅火系招式強化,可以強行用熱風突破。

 

對策四,噴火龍X。火系/龍系;單單係屬性,已經將火系同草系招式1/4,飛行系等倍攻擊,只有並唔常見嘅龍之波動作剋制嘅2倍傷害。相比起席多藍恩,噴火龍X有龍系招式作為攻擊手段。面對怕物攻嘅噴火龍Y,絕對係綽綽有餘。當然上面提到嘅妖精系屬性聯防,係要注意。

 

對策五,廣域防禦。雖然噴火龍Y只會有一招範圍技,熱風,但係晴天下,火系嘅熱風必然為噴火龍Y嘅主要攻擊手段。備有廣域防禦,可以等對方顧忌,而唔用熱風。成功用廣域防禦抵擋熱風嘅話,就變相換嚟一個回合嘅免費攻擊機會。當然,廣域防禦本身,並唔係針對噴火龍Y同熱風而設,而係同時對應岩崩、地震、暴風雪等常見招式。對噴火龍Y嘅剋制能力有限,只係當你真係以上四策都無準備到嘅話,都應該要考慮下對住噴火龍用廣域防禦。

 

好喇,我哋介紹過天梯賽使用率第一、普通而強大嘅袋獸,使用率第四、主題鮮明晴天隊嘅噴火龍Y。下次我哋再介紹動畫炒到好炙手可熱嘅 甲賀忍蛙。

 

回帶相關文章:

《Pokémon天梯入門》No.115袋獸

 

 

古渡

《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章