之前都只係介紹 LEGO 官方產品，都未有機會介紹下啲第三方產品。第三方產品唔喺講緊喺深水埗鴨記買嗰啲老翻樂X啊！第三方產品係用返 LEGO 原件再喺上面加以設計同印刷嘅產品，設計比較獨特但價錢相對高少少。

The BRICKER 台灣 LEGO 嘅第三方產品團體，喺 5 月就出品左佢地第一件產品豪傑系列—關羽雲長。

但短短半年就見到豪傑系列嘅第二彈—宮本武藏。

作為一個日本武士L，有廠出宮本武藏仲唔即刻狗衝訂！一收到嘅時候一開！

哇~！

淨係呢個包裝，我愛上左 The BRICKER！

打開第一樣見到將 Minifigure 獨立分開包裝，唔會令其他件整花啲印刷，超窩心！

成個武藏 Minifigure 只可惜唔係一頭兩面，但睇到佢嘅刀疤、手臂、衫褲甚至背上嘅”二天一流”印刷非常仔細精美，嗰少少嘅可惜就由佢啦。配埋大刀同船槳，宮本武藏 Minifigure 完成。但係 The BRICKER 嘅宮本武藏依家先係重點開始。

為左配合巖流島場景，The BRICKER 搵左好多透明件去比玩家去製作浪花嘅動態效果。

就咁獨立睇好似一隻手XD

細細嘅地台又有岩石假山、有海浪拍岸。 就咁睇你會發現個地台好似得一半，但原來咁設計係為左配合將來嘅”佐佐木小次郎“作品！

 加埋個浪花，成個巖流島場景就完成啦！

放埋宮本武藏落去，The BRICKER 豪傑系列第二彈 巖流島對戰組-宮本武藏 完成！

一個小小場景加埋一個 MOC Minifigure 如果你初回訂購都只係 $1350 台幣(依家當然冇咁平啦！)，最難得係冇見過其他嘅第三方公司出過靚嘅日本武士或者武將嘛。

大家睇完真係有興趣都唔洗特登走去台灣喎，原來 The BRICKER 喺香港有合作伙伴，想訂嘅朋左可以向BATISBRICKS查詢。

雖然問過 The BRICKER 豪傑系列—佐佐木小次郎仲喺前期製作階段，但另一系列已有初稿登場。想知係咩可以去佢地嘅 Facebook 睇下！(笑)

The BRICKER Facebook Page : //goo.gl/J63JU7