Open World 生存 Game《柯南的流亡 CONAN EXILES》新作介紹

相信大家都知道邊個係名偵探柯南,其實佢既前身係 Robert E. Howard 筆下作品《王者之劍 Conan the Barbarian》,而且仲有拍過由阿諾·舒華辛力加主演既真人版電影添!(以上純粹9up) 呢隻遊戲除咗主打多人生存之外,仲會有大量大型魔物打,極有 Online Game Feel,現階段黎睇都幾吸引下!

 

遊戲係由 Funcom 所製作,遊戲背景係蠻荒世界,講到明蠻荒世界食人妖同猛獸當然唔少得啦,最正既係仲會有「神」黎郁你,要迎擊已經頭痕啦,仲要搵水飲搵野食……玩家們就係要扮演流亡者喺呢個世界生存啦。

 

conan

conan-7 conan-3

 

類似既生存遊戲有《DayZ》、《Rust》、《ARK: Survival Evolved》等等,咁呢隻《CONAN EXILES》又有乜特別呢?基本既獵殺動物、種野食、採集資源外、打造工具同武器、收集建築材料起城等等全部都有。對敵方面打人同打魔物係二樣野黎,因為係奇幻 Feel 既關係極多大型魔物,成座山咁大條既蛇都會見得到。對人戰黎講除咗簡單咁剷爆敵方據點之外,仲可以俘虜 NPC,收佢地做兵或者工匠咁。唔想俘虜又可以拖啲屍返去據點再喺祭壇奉獻,達成條件仲可以召喚「神」落凡間幫拖!

 

conan-12

起城 Mode 做得幾靚

 

conan-13

召神同巨蛇隻抽!

 

conan-11

conan-10

 

玩得呢類 Game 最驚果樣就係做唔到網絡黑社會唔夠疊馬 (喂 Online Game 係咁架啦),官方對呢個問題亦都諗得幾足。首先佢地標明自己並唔係 MMORPG,另外除咗 Join 官方 Server 仲可以自己做 Host 開 Server,可以自訂規則並且邀人入黎玩,成個世界自己做主,咁就唔洗下下輪班守城啦!

conan-5

conan-2 conan-4

 

雖然睇片見到啲動作唔係幾流暢,打擊感又似乎怪怪地,但係綜合遊戲各種元素係幾值得玩既。《CONAN EXILES》PC 版預定於 2017 年 1 月 31 日開放搶先體驗,Xbox One 版本就預計 2017 年春季先有。

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章