相隔 20 年最新《Power Rangers》電影 – 《Power Rangers: 戰龍覺醒》今個禮拜就上映，今次係《Power Rangers》第三部電影，先前分別有兩齣電影作品，分別係 95年《Mighty Morphin Power Rangers: The Movie》及 97年《Turbo: A Power Rangers Movie》，前者全球票房大賣，創下約6千6百萬美元票房紀錄，後者慘淡收場。導演 Dean Israelite reboot 整個電影電視系列，究竟會為觀眾帶黎咩新衝擊呢 ? 今次就等我同大家介紹下 《Power Rangers》20年黎你可能唔知道嘅小秘聞啦~

95年首部電影版《Mighty Morphin Power Rangers: The Movie》

97年《Turbo: A Power Rangers Movie》

《Power Rangers》同《Jurassic Park》有關係 ! ?

1993 年美國公司 Saban Brands 眼見《Jurassic Park》(侏羅紀公園)上映大受歡迎，全世界掀起恐龍熱潮，所以就同日本東映買版權，選擇咗同樣用恐龍做主題嘅《恐龍戰隊》，亦係超級戰隊系列中第一隊有六位戰士嘅戰隊，由 Saban Brands 改編故仔而推出長篇劇集《Power Rangers》，全片以美式校園故事風格，採用外國演員，只係拍攝變身前文戲部分及演員穿上原裝日本《恐龍戰隊》嘅戲服演嘅少量打鬥場口，其餘都係剪輯日本《恐龍戰隊》嘅戰鬥畫面，所以成日出現一時小鎮場景，轉眼變成高樓大廈嘅唔接戲情況。

《恐龍戰隊》

《Power Rangers》以美式校園故事風格

特別一提美版黃戰士改為女人

雖然係咁，但係 《Power Rangers》呢種英雄劇集出奇地好啱美國人口味而大受歡迎。其後更繼續同日本東映購買《五星戰隊》及《忍者戰隊》嘅版權改編推出 season 2 同 season 3，而香港仲出現奇怪現象，當時 TVB 就買咗日本原裝嘅《恐龍戰隊》播映權，打對台嘅亞視就買咗《Power Rangers》嘅播映權，仲改名叫《新恐龍戰隊》，就係咁多得亞視我地先有機會認識到《Power Rangers》，仲比首主題曲目洗哂腦㖭~

初代《Power Rangers》演員近況
紅戰士 – Austin St. John

住係美國東岸嘅 Austin St. John 細個已經習武，已考獲跆拳道黑帶二段及柔道黑帶一段，真真正正打得之人，所以係劇集嘅打鬥埸面都親身上陣，之後仲成為武術教練同推出武術教學影碟，而同樣係《Power Rangers》飾演黃戰士嘅 Thuy Trang 都有係影碟中友情客串。而家 Austin St. John 就係擔任消防員兼緊急救護員。

Austin St. John近照

黃戰士 – Thuy Trang

初代《Power Rangers》唯一嘅亞洲人，繼 《Power Rangers》後有份參演《The Crow: City of Angels》飾演 Kali 一角，本來星途無限，可惜 2001年係 San Francisco 遇上車禍逝世，享年只得 27 歳，初代《Power Rangers》全部成員除咗飾演綠戰士及白戰士嘅 Jason David Frank 都有出席葬禮追悼呢位初代黃戰士。

《The Crow: City of Angels》飾演 Kali 一角


綠戰士/白戰士  – Jason David Frank

Jason David Frank 係咁多個初代《Power Rangers》成員中，參演《Power Rangers》系列時間最長嘅一個，亦係飾演最多顏色戰士嘅一個，由最初綠戰士，因劇情發展能力賜予比紅戰士，失去綠戰士力量，其後再獲得白虎力量 (原設為五星戰隊第六個戰士)，成為白戰士，去到96年 season 2 更擔正做隊長成為紅戰士，直至 2004年最後一次參演《Power Rangers》系列 – 《Power Rangers: Dino Thunder》(原設為爆龍戰隊)中飾演黑戰士。

而家就成為美國綜合格鬥 MMA 運動員，成績仲非常好，而今次《Power Rangers》電影中 Jason David Frank 亦有份客串，唔通有綠戰士登場 !?

 粉紅戰士 – Amy Jo Johnson

同樣地有份係今次《Power Rangers》電影中客串嘅 Amy Jo Johnson 自細就精於體操，所以當時好容易就得到粉紅色戰士嘅角色。Amy Jo Johnson 亦係眾成員中最活躍嘅荷里活演員，參演過數齣電視劇，2014 年後淡出荷里活，夾咗隊 Band 叫 Valhalla，負責主唱同結他。

黑戰士 – Walter Emanuel Jones

住係 Los Angeles 嘅 Walter Emanuel Jones 而家都有時參演電視劇，包括 Marvel 劇集 – 《Agents of S.H.I.E.L.D.》中飾演毒販一角， Walter Emanuel Jones 仲係個配音員，2014年嘅《Divergent》(分歧者·異類叛逃) 亦有份擔任配音工作。

《Agents of S.H.I.E.L.D.》中飾演毒販一角

藍戰士 – David Yost

David Yost 係參演 《Power Rangers》期間公開承認同性戀身份，更表示自己曾花費兩年時間去轉變性向但最終失敗。2010年受訪亦表示當年拍攝《Power Rangers》劇集期間因為同性戀身份受盡歧視及欺凌，其後頂唔住放棄參演《Power Rangers》。

David Yost 因為同性戀身份的壓力一度有情緒問題，後來精神狀況好轉，重新接受自已，仲不時著藍戰士服裝同 fans 接觸同合照，而家就退居幕後，成為電視監製。

首部涉及同性戀原素嘅超級英雄電影
今次最新嘅 《Power Rangers》電影?面嘅黃戰士設定為女同性戀者，亦係首部超級英雄電影作品有同性戀題材，或者導演 Dean Israelite 係想為初代藍戰士 David Yost 爭番啖氣，向歧視及欺凌說不。

美國歌手 Becky G 飾演黃戰士

Crossover 作品
當年美國公司 Saban Brands 除咗買咗戰隊版權，其實仲買咗《幪面超人 RX》版權，同《Power Rangers》一樣改編故仔同剪輯原版戰鬥片段，更誇張嘅係美版《幪面超人 RX》會剪輯其他幪面超人作品包括《幪面超人 ZO》及《幪面超人 J》嘅戰鬥片段，出現前一秒係 RX，下一秒變咗另一個拉打嘅情況發生。美版《幪面超人 RX》推出兩個 season 總共40集嘅劇集作品，但最後反應慘淡而腰斬收場。

美版光太郎

係《Power Rangers》season 3 中頭三集，美版《幪面超人 RX》亂入 crossover ,亦係史上第一次超級戰隊同幪面超人共演嘅作品。

美版《幪面超人 RX》trailer

//www.youtube.com/watch?v=8YeTITmZRA4

美版《幪面超人 RX》漫畫作品

除咗劇集作品，美漫界亦有crossover 作品，先前《Power Rangers》就同《Justice League》推出過 crossover 漫畫，而今年1月因為要宣傳新嘅《Power Rangers》電影上映，兩部作品再次 crossover，推出《Justice League/Power Rangers》。

故仔講《Power Rangers》嘅大奸角 Lord Zedd 又黎侵略地球，某原因亦牽涉 Justice League 嘅世界，Power Rangers 同 Justice League不打不相識，黑戰士仲同 Batman 交過手，最後兩大英雄隊伍聯手撃退 Lord Zedd !

Go Go Power Rangers ~~~ 《Power Rangers》嘅主題曲膾炙人口，而 《Power Rangers》亦係8丶90後嘅兒時回憶，希望今次新電影版可以帶黎全新嘅體驗 ，延續經典。