呢兩年有唔少動漫經典推陳出新，《龍珠超》是其一，不過近日混戰大會嘅劇情，有巴打卻反而覺得平衡宇宙班牛頭馬面，令人諗起《幽遊白書》嘅暗黑武術大會。

同天下一武道大會一樣，暗黑武術大會都係唔少人心目中嘅經典，嗰種一出場龍爭虎鬥嘅場面，今日已經再搵唔返，100%中的100%令人懷念；就算後來Hunter嘅排球團戰，都已經係兩回事啦；年輕時代嘅冨奸，係有佢立足於世人頂點嘅魅力，即使佢係一個毒男，只要有足夠才華，女神都要反過來做兵幫佢畫畫。同《幽遊白書》個幽助一樣，就算明明係MK仔，都可以有女有power有桑原。

咁L化世人嘅童話故事，真係講你都唔信。

想當年紅白機過度超任，可能冨奸無乜嘢好玩，索性玩認真，畫咗套渾然天成有齊奇幻、BL、心理同格鬥元素嘅《幽遊白書》（後來同出版社鬧翻草草完結有點可惜）。《幽遊白書》自然係鬼才之作，但仙水篇先係死前必睇。

仙水篇入面，前度靈界偵探仙水身負七種人格，剩半個月命都要救世，企圖打開魔洞救贖自己⋯⋯呢種強大Boss設定開創先河。仙水爆聖光氣後非聖亦非人，連魔封環都奈佢唔何；聖光氣仲可以實體化變成盔甲，唔係純粹變成超三。

回味幽助同桑原嘅友誼、仙水同樹嘅Guy絆，原汁原味廣東話配音，嗰種草根死臭飛型MK幽助，今日喺MK已經再搵唔返。桑原話：「話之佢係仙水定水仙，就算佢變做潽洱、壽眉、香片、鐵觀音都唔使怕架，打鬼殘佢啦。」決戰後仙水所有用廣東話問幽助：「你頭先好似好high好enjoy咁。」種種緣份偶合，就構成咗我呢類宅男嘅時代回憶了，今日諗返起，真係好寂寞啊。

弊在今日嘅冨奸好似乜game都玩咁，要佢連載仲慘過乜，嚟緊又話要重新連載Hunter喎，相信要復刻《幽遊白書》整隻超任指令手遊出嚟，一定遙遙無期啦。不過好彩，聽講近年幾有誠意密密更新遊戲嘅《怪物彈珠》，將會推出《幽遊白書》crossover角色，仲要正正就係仙水篇添﹗日本仔飛雲，你嘅機會嚟啦，或者你可以喺遊戲入面搵返，令人懷念嘅老MK幽助。