向W致敬!? 玩水樽新拉打 Build 懶人包介紹 !

雖然本身算係個拉打迷，但上代拉打 EX-AID (以遊戲做主題) 已經唔係幾啱我口味，平成年代最鍾意都係以偵探同USB手指做主題的拉打 W，前排諗住會有新的後繼作品，點知原來係漫畫，有D失望，直至前幾日，官方正式公佈平成第 19 代拉打 – 拉打 Bulid，睇完外形同變身腰帶，即時令我同一眾拉打迷諗起拉打 W ，唔通同一個世界觀 !?

日本被分裂 !?
官方發佈資料就無提及到同拉打 W 有關，今次主角「桐生戰兔」係平成拉打之中擁有最高 IQ 及首位平成主角設定為科學家，號稱「天才物理學家」，頭腦同身手都擁有驚人能力，出場口頭蟬為「勝利的法則決定了!」。

故仔講地球人係火星發現「潘朵拉之箱」，打開後地球突然出現稱為「天空之壁」的巨大牆壁，將日本分割成三塊，分別為「東都」丶「西都」丶「北都」。有一日主角「桐生戰兔」唔知咩原因突然暈底仲要失埋憶(咁似拉打阿極陀個主角) ，好彩比咖啡店老闆「石動惣一」發現同收留(拉打總係同咖啡店老闆有淵源)，原來呢個咖啡店只係一個掩飾，裡面其實係秘密機地「Nascita」，主要與怪人「 Smash 」戰鬥守護城市，主角「桐生戰兔」就順勢成為拉打 Build 。「桐生戰兔」失憶原因就同另一主角「萬丈龍我」有重大關係，一個因為打假拳賽而比驅逐的格鬥家，仲被冤枉殺人而被捕，之後發展到 Build 幫手逃獄，Build 想查明自己失憶原因，所以決定同「萬丈龍我」成為拍檔一齊追尋謎底。

係火星發現「潘朵拉之箱」

「天空之壁」將日本分割成三塊

插水樽變身!?
今次拉打 Build 同拉打 W 設定上都極為相似，同樣以兩種不同能力互相配撘成為新型態，Build 的變身道具就係吸收各種各樣物質成分的「Full Bottle」，分別以生物及機械的組合而轉換唔同形態。

「Full Bottle」

變身腰帶為「Build Driver」，腰帶有兩個「Full Bottle」插口，左邊是生物類型，右邊是機械類型，變身只要插入「Full Bottle」就會發出音效「Best Match」，然後轉動腰帶左邊的手攪變身及轉換形態。

基本形態為Rabbit Tank Form (白兔 + 坦克 )，轉換形態包括Gorilla Mond Form ( 猩猩 + 鑽石 )、Hawk Gatling Form ( 鷹 + 格林機槍 )、Ninnin Comic Form ( 忍者 + 漫畫)、Rocket Panda Form ( 火箭 + 熊貓 )、Fire Hedgehog Form ( 烈焰 + 刺蝟 )、Lion Cleaner Form ( 獅子 + 吸塵器 )、Key Dragon Form ( 鑰匙 + 龍 ) 等等。