《爐石戰記》Best of Hong Kong W2 冠軍牌組介紹-韓國k神

Hello大家好,繼續同大家介紹今星期《爐石戰記》Best of Hong Kong W2 冠軍選手 - TaSa#4999嘅參賽牌組,今日要講嘅呢一副係被命名為「韓國K神」嘅盜賊牌組。睇個名就知道呢副牌嘅概念就係嚟自著名嘅韓國選手Kranich啦,咁到底即係咩呢?我哋一齊睇睇啦。

牌組介紹


其實呢副牌就係前排大熱嘅館長親王盜,韓國K神Kranich就以佢為雛型然後進行左一啲針對性嘅小改動,例如放左藍逆鱗龍人嚟對抗牧師嘅龍火藥水、加入之前好流行嘅「單刷王」3/3/3兇惡幼雛,再加上冷光神諭者補牌抽牌。呢副牌組亦成功為K神打上亞服#1,就知有幾咁利害啦!而Tasa就以Kranich嘅改良版作為藍本再作出一啲個人化嘅改動,從而令到呢套牌更適合自己嘅套路:例如將補牌魚人、破法者抽起,換入兩張傳說手下『收藏者』夏庫同『毒化心智』薩瑞爾;換出焦油蠕行者同減左一張軍情七處密探換入兩張惡潮多頭蛇等。以上呢啲改動其實都係對應返冰封王座2.0 nerf改版嘅環境,大量快攻牌組如海盜戰、魚人系列等被減弱,於是TaSa就將某啲對抗快攻嘅卡牌換成針對近排Meta牌組嘅卡。

單卡分析

凱爾希斯親王呢張卡雖然係會對快攻同鋪場類牌組有強大幫助,但2費曲線實在太重要,如果一套快攻卡組2費時無牌出嘅話會造成好大影響,為咗親王而放棄一啲實用嘅2費卡真係唔值得,而且亦未必可以準時將佢抽到手,所以凱爾希斯親王由一開始就被人話係0分廢卡。
但經測試後發現,通過置入大量1費手下就可以避免2費無牌可出的尷尬情況,再加上賊嘅英雄能力唔會破壞節奏,所以親王就成為咗盜賊嘅好伙伴啦,直到依家更成為咗超級熱門添。大量以佢嘅名嚟命名嘅牌組陸續出現,試諗下開局2費開親王buff然後下一輪出1費海盜免費特召2/2嘅海盜派奇,即刻就會拎到場優!

兇惡幼雛可以話係對抗牧師嘅利器之一,大家都知道依家卡札牧係有幾勁有幾麻煩,準時報到嘅兇惡幼雛成為咗一張對手必須要最優先解決嘅卡,而親王buff後,會變成牧師難以處理的4/4攻數值,對面比你單刷、出現雪球效應令對手崩盤嘅機會大大提升。

除咗兇惡幼雛之外,牧師係面對超強快攻牌5/8/8惡潮多頭蛇亦會相當難受,因為牧師對於準時5/8/8惡潮多頭蛇基本上係無咩防禦力,成副牌就只有一張暗言術:死可以直接解,如果解唔到就會直接硬食至少兩拳8血喇!

小編小建議

呢套牌有好多低費牌,要注意唔可以盲目鋪場,要留意落牌嘅節奏,因為比起原本嘅親王館長盜少左抽牌魚,令到有機會出現缺手牌嘅情況,點樣利用夏庫來賺牌其實都要好好咁思考同運用。除此之外更要諗好連擊嘅問題,有無需要特登留1費卡嚟做連擊呢。
而3費嘅南海船長同軍情七處密探可以同一樣係3費嘅焦油蠕行者做替換調整,睇下你需要偏向打攻擊、快攻,定係防守型。
最後值得一提嘅係會有人落埋4費瓦拉納爾親王變為雙親王賊,但小編覺得咁樣做有少少卡,同埋水晶線會唔夠平滑,點講都好啦呢套牌都算係快攻型deck。希望佢可以幫到你哋拎到好成績吖 !