文長，涉及劇透，總結在最尾，想睇評分可直接跳到最後。

打左咁多年機，係呢幾年，我有一種特別既感覺…….講唔出到底係咩感覺，但係我明顯咁發現，佢通常都出現係Ubisoft 既遊戲入面。

Far Cry 4, The Division, Watch Dogs 2, Ghost Recon Wildlands 同埋而家Assassin’s Creed Origin

佢地都有一個共通點，呃…….除左佢地都係開放世界遊戲之外。

佢地全部都好悶！係極悶，一種你形容唔到既悶。佢地明明畫面技術好先進，遊戲設計冇問題，甚至乎大部份時間都好正常咁運作緊…..除左你要玩連機果陣啦下…..

佢地係人物或者場景既美術設計上面冇乜令人驚豔或者跳脫既表現 (望向Persona 5)，音樂大氣得來正路但你唔會特登攞來聽(望向Nier: Automata)，個故事平鋪直敍得來冇新意，一唔係就直頭冇故事添。最慘係佢個開放世界，咁多年喇…….佢地都仲係未識整一個好玩既開放世界。你睇睇Zelda, 你睇睇The Witcher 3? 幾年既時間向GTA5 同Skyrim 呢兩大開放世界神作稍為借一借鏡，其實你自己本身就離神作不遠…….

我第一次係睇優點同缺點之前就已經想比分…….B+

有讀過大學既朋友應該都知道除非你果科係Killer 或者頹科，如果唔係mean 應該都係B range。係唔係好差，又唔係既，你唔會有危險，但都唔係好好。即係正正常常有溫書去考試，做Project 冇乜差錯用返書上堂教既野去寫，咁咪B+ 囉。真係唔係差，只係個個都一樣啫………

話雖如此，我都係要同大家睇下改變左既刺客信條，係三年既努力之後有D 咩優點同缺點。

個戰鬥系統終於肯改！

說起來，防守反擊呢種動作戰鬥系統好似係由刺客信條發明先。至到後來演變成Batman Arkham 系列既變化，已經係後話。

十年來，除左呢一隻之外，全部既刺客信條都係用同一個戰鬥系統 (佢地係Unity 果陣話改左，但其實玩過都知冇分別) 及後，因為Batman Arkham 系列，同埋Dark Souls 系列太成功，所以呢個世界既動作遊戲由Devil May Cry，乃至Nier: Automata 呢一條血脈，慢慢分成Batman 派同埋Dark Souls 派。其中以Dark Souls 派追隨者眾，分別有自己整既Bloodborne，仁王，The Surge 等等……而Batman 派就有Sleeping Dogs 同埋Middle Earth: Shadow 系列。

世界上仲有冇第四個派別？我諗唔到有了，呢個係可悲既現實，但呢幾種做法係經過銷量證實好賣，所以大家先跟住做，別無他法。(別注︰Darks Souls 乃至現代所有第三身動作戰鬥都係參考緊N64 既薩爾達傳說︰時之笛，呀……偉大既任天堂！)

而今次，刺客信條就放棄左自己發明既防反系統，轉投左Dark Souls 派。原因？施主，其實Batman 派易學難精，要同時兼顧攻擊動作既流暢度，同一時間要玩家有不同方法去應對唔同敵人，再係玩既時候有一種爽快感，係好難架！如果唔係就唔會咁多年都係得Shadow of Mordor 一個系列抄到啦！

而至於今次刺客信條改左做Dark Souls 模式既戰鬥，其實係幾好玩既。尤其係遊戲中幾種不同既武器有完全唔同既招式同效果，再加上主角本身既技能，同埋隨機生成既裝備效果，其實戰鬥都幾千變萬化。玩家要就住用緊唔同既武器去計算攻擊距離同埋範圍，用盾擋箭要注意方向。某D 敵人既攻擊可以破盾，而敵人既防守亦都要你用重攻擊或者蓄力重攻擊先打得開。你需要係敵人攻擊既一瞬間，決定自己係閃開，硬擋，定係Parry。當然佢在Dark Souls Formula 以外既重點，就係刺客隨時都可以用弓箭，而且仲有近身專用弓，為戰場帶來不少變化。

製作者都知道呢個係遊戲既一大賣點，所以都特登整左競技場模式，比玩開Dark Souls 既師兄試下遊戲真正既難度。我就算喇，我打普通難度開個成就得架喇。

呢個亦都係我覺得遊戲做得最用心既一部份。

百抄成材，借來的遊戲 #2

上次已經用過呢條題，今次唔會再用啦，大家仍然要留意返抄唔一定係唔好，其實呢個係優點來。先唔講上面既「新」戰鬥系統其實係抄Dark Souls，除左刺客信條自己發明既攀爬系統之外，遊戲入面幾乎所有野都係抄既。

裝備同技能升級系統美其名係可以比大家收集神裝、自訂成長方向變成玩RPG，但其實可以自訂既野同Rise of the Tomb Raider, Far Cry 系列幾乎係一模一樣。而且最重要既幾種裝備屬性(血、防、遠近攻擊力) 都係由刺客信條3, Far Cry 3 開始既狩獵系統延伸出來，老實講執神裝意義不大。

弓箭方面，除左Rise of The Tomb Raider 之外，近期既Horizon Zero Dawn 同薩爾達都成為抄襲對象。箭射牆引開敵人，唔同種類既弓，再加上半空瞄準會慢動作…….喂唔好一次過抄咁多人得唔得呀，記唔切呀！

仲有隻鷹…..用佢來標記敵人做到潛入效果既玩去，咪即係Watch Dogs 2 果隻無人機來？幾時放埋貓呀？地面爬牆腳入去幫你開門都OK喎！

以上其實並非眨義，只係希望大家如果玩過以上遊戲既話，大致都會明白遊戲中主要系統既玩法，咁我就唔洗多作介紹。最重要係以上系統其實組合一齊工作既話係可行既，而且冇嚴重破壞遊戲性，咁就足夠。

但係果隻馬就………隨時隨地叫得到馬而且隻馬係識得自己跟路行呢個構思其實係Red Dead Redemption 開始，跟住The Witcher 3 都有抄，只可惜其實兩者都離唔開Bugs 呢個死穴。

Ubisoft 作為出名多Bugs 既公司，卻反而自己鐘個頭埋去…….咁咪慘不忍睹囉！雖然，Bayek 隻馬…或者駱駝，並唔會卡住左係屋頂，但係隻馬要隨時隨時來到你身邊，其實好靠AI 認路，而認路最重要既就係…..路！我意思係你遊戲入面點樣同AI 溝通路呢個concept。

以上果三隻Game, 或者應該話係所有遊戲甚至乎係現實世界，都克服唔到呢個世界有D 地方係唔會有路，唔應該有路呢個問題。如果冇路，AI 點帶你去呢？而你身處果種地方，隻馬又點去接你呢？所以所有用馬既遊戲，都永恒地會有隻馬卡住係奇異位既情況，我真係諗唔到可以點搞，有冇人有高見？

而刺客信條︰起源做得比較差既野就係，佢本身所設計同鋪排既路，明顯冇經過詳細既思考同測試，又或者係馬AI 對於路既算法掌握得唔好，所以成日會發生兜路既情況。明明條路都冇話係單行線，又冇話唔比U-Turn (古埃及邊有呢D 交通規則架) 咁點解隻馬永遠要去到分叉路口迴旋處先允許U-Turn 呢？「行多好多路喎師父，屈錢呀？」

OK，以下落來比較有少少趕收工，不過認為我只需要提出一個好重要既缺點。

故事極度薄弱

果D 咩音樂音效麻麻地呀，地圖太空曠冇得飛簷走壁呀，個AI 偵察潛行果陣short short 地呀…..呢D 半好半壞既野唔評論喇，我只係想講下個故事，一個唔知發生緊咩事既故事。

其實刺客信條系列不嬲都有故事弱既問題，但其實前面果幾集我地只係唔太識歐洲既歷史啫。好多出場既角色同埋全部刺殺既對象，都係真實既歷史人物來。如果有咁上下歷史知識，係容易代入好多既。

去到古埃及，雖然整個時空設定甚至乎係所有地理位置，都有做足功課，但係好多人物或者故事變成憑空創作。話哂都係2000幾年前，你真係肯定果班被刺殺既對象莫名而死？

於是乎個故事變得更加難代入，而遊戲係完全冇打算為任何角色多作介紹！往往係你打打下，佢會叫你去新區域，你會見到新NPC 比主線任務你。「喂你邊位呀？」跟住你幫佢打完，佢又會叫你去新區域，你又會見到新NPC 比主線你。「喂你又邊位呀？」跟住無限LOOP 然後你就爆左機喇………..

呢個死症同Horizon: Zero Dawn 一樣，除左主角同佢養父，你仲記得邊個丫？呢隻刺客入面除左Bayek 同Aya 你仲記得邊個丫？Cleopatra 囉，幾靚女呀！

鏡頭一轉我地返來睇睇Skyrim 同GTA 5 點做呢件事？GTA 5由最初叫你偷車個大叔，去到仆街FIB，去到最後個有錢佬，就算只係玩過一次，就算你唔記得佢地叫咩名，就算我上一次GTA 5 已經係2013年……..佢地講既對白我仲係腦海聽到有聲，因為佢地有故事，有性格，個任務有意思！

Skyrim 入面比較悶既The Companion 唔在講，成班NPC 都有一個黑暗既秘密。Dark Brotherhood 同Thieves’ Guild 既支線唔單止滿足感大，有幾個結局，入面仲有好多令人咬牙切齒或者搖頭婉惜既NPC。

再睇睇The Witcher 3，每個主要配角都有一整條任務線，除左延伸返佢地小說入面既人物性格同故事之外，最後仲要call 佢地一齊守城。每個角色都係遊戲體驗既一個重要部份，缺一不可。

我都唔係要求你下下要做到神作咁……..唔係喎，你仲多錢過The Witcher 3 果班人架喎，幾年時間去做一個AAA 既遊戲，唔係應該要求你做到神作咁咩？The Witcher 3 既支線求其一個都可以玩到雕花咁，你Ubisoft 唔得唔怪你，都唔洗無聊到咁啫下話。一路落來竟然冇一個主線或者支線任務係值得記住！每個任務都係救人搵野殺人救人搵野殺人…………而其中既NPC 除左多謝同埋叫你再去第二次救人搵野同埋殺人之外，係一滴故事既成份都冇，要好強調係一滴都冇！呢啲唔係叫支線任務呀，係叫逼癲任務，你逼到D 玩家就來癲喇！

其實遊戲入面明明有好多機會或者方法去利用已經存在既重要配角NPC 來講故事。Apollodorus 作為皇后既副手，理應有好多污糟野要你幫手做，而遊戲入面亦都有指明呢個任務係Apollodorus 比你，但竟然只係係告示板度接，而且唔洗多講又只係殺人。如果就住呢個重要NPC 去開另外一條線，應該都大把野寫，因為佢係反叛軍既首領，同一時間又幫女皇管理秘密組織，太多機會喇。

法老王Cleopatra, 老婆Aya……等等等等好多角色除左主線就冇同主角有任務直接接觸，幾浪費呀！

同場加映︰被消失的真實世界故事線

自從Desmond 死左之後，刺客信條既真實世界線就好似比人丟埋一邊咁，今集就直頭去到一個極致！真實世界果邊個故事完全冇頭冇尾既，如果你唔去主角個電腦度自己睇EMAIL 既話，咁主角、佢朋友，Abstergo 發生緊咩事，現代刺客又做緊乜，其實係完全冇講過！如果只計呢邊個故事，其實同Destiny 1 叫你自己去睇Database 冇分別。如果計埋古埃及既故事，完全平鋪直敍爆爆爆爆正常去Ending 咁既故事，其實即係Destiny 2 果種叫做所謂有故事mode…………….

點解係都要用Destiny 來做比較？因為佢Online game 來，唔洗故事都生存到，而你作為單機遊戲，個故事就退化到同人地一樣級數，失望到我眼都跌埋出來……

總結︰恨鐵不成鋼呀！

遊戲基礎分︰80

好多人都話今集刺客好好玩，但係除左換左個好玩既戰鬥系統之外，遊戲其他方面其實並無多少可取之處。戰鬥系統比你係跑主線既時候殺下人、殺下時間都還OK，但冇故事係背後支持，好快就會變得重複同埋沉悶，尤其是你識玩之後。缺乏兩邊世界既故事內容對於世界觀既發展有莫大影響，長此下去系列續作將唔會再有足夠既故事去消費，最後只會變成Call of Duty，為出而出。

+戰鬥系統大改

+新時空背景夠大膽，有新意

-幾乎冇故事可言

-遊戲其他系統算不上優點

最終評分︰78

佢係一隻好普通、太普通、超普通既遊戲，你認真想搵，但佢冇一個地方有特別