《Monster Hunter:World》全14種武器簡單介紹及出招表

今日《Monster Hunter:World》就正式推出啦,作為全新作品當然會吸引大量萌新獵人加入,但係大家又揀咗適合自己既武器未呢?遊戲中總共有 14 種武器,每一種武器攻擊模式、風格迥異,我地以下將為大家作出全 14 種武器簡單介紹,希望幫到各位萌新獵人!

 

 

大劍

攻擊速度以及拔刀中移動速度極慢,但係換黎既就係極高單發攻擊力。招牌動作為蓄力斬,只要按住按鍵即可以進行蓄力,蓄力完成後鬆開按鍵即可使用出大威力蓄力斬。蓄力斬可以分為三段蓄力,一段蓄力斬暫時未發現有什麼特別效果,二段蓄力斬則會提升後續技能傷害,去到頂級三段蓄力斬就算斬味不夠亦都唔會彈刀,同時大劍仲可以做出防禦動作,不過要留意檔格都會扣斬味的。

另外今集新增動作「衝撞」可以通過多種連攜技能中觸發,距離短並且無法直接使出。「衝撞」好處係可以取消蓄力過程並直接提升蓄力斬段位,同時仲會有霸體效果,對咆哮以及風壓免疫,如果善用呢招絕對會增加輸出。

大劍出招表

 

太刀

 

雙手使用之巨型大刀,與大劍長度接近,但係就以靈活動作及連續攻擊見稱。當練氣槽儲滿後就可以使用R2施放四段派生氣刃斬,如果連擊最後一 Hit「大迴旋斬」成功命中的話,練氣槽剩餘氣槽將會清空,並且練氣槽等級會提升一級,同時獵人傷害會按百分比提高,攻擊力非常可觀。

練氣槽總共能提升三次等級,依次序為白>黃>紅。 每個等級會有一定持續時間,時限到了就降等,會一直降到沒有為止。順帶一提雖然紅槽傷害提升百份比最高,但持續時間亦係最短,所以點樣長期保持紅槽係太刀使用者既必修課題。

太刀出招表

 

 

片手劍

 

片手劍屬於空隙小,攻擊快速既武器,由於攻擊後空隙小所以相對地迴避魔物攻擊亦都較容易,但係由於攻擊距離短所以使用上起亦都唔可以掉以輕心。此外位於右手既盾可以進行防守動作,如果用盾攻擊頭部甚至可以增加氣絕值。

片手劍另一特點在於拔刀狀態下可以使用手弩及道具,便利性十足。另外仲可以帶目標魔物弱點屬性武器,發揮片手劍攻擊次數多既優點,使用得宜的話攻擊力亦都不能睇少!

片手劍出招表

 

 

雙刀

 

個人感覺比較適合萌新獵人既武器,擁有高攻擊頻率及高機動力特性。當中最精彩部份就係鬼人化,玩家可隨時按下 R2 開啟鬼人化,鬼人化下不但招式有變化,傷害會提高、提升攻擊頻率及機動力,同時翻滾會變成滑步,當然滑步亦都會消耗耐力。不過一旦開啟鬼人化後,耐力就會不斷消耗,玩家雖要注意留返少少氣迴避。

另外鬼人化下攻擊魔物會補充鬼人槽,當鬼人槽儲滿時就會刀刃發光以及不停閃爍進入超鬼人化。係超鬼人化下即使切換回普通形態亦都可以消耗鬼人槽使用鬼人連斬。

基本上就係先開鬼人化儲鬼人槽提升傷害,無耐力就切回普通形態繼續劈,久唔久就用 O 黎調整位置,如果遇到魔物出現大硬值就用亂舞開餐咁。

雙刀出招表

 

大槌

 

擁有壓到性破壞力但又兼備機動力既打擊武器。攻擊魔物可以令到魔物疲憊,如果瞄住頭黎打的話仲可以令魔物氣絕。而且使用二段蓄力攻擊仲會附加額外氣絕值,所以基本上玩大槌就係不斷蓄力使出大地之擊,勁 Man!

大槌出招表

 

狩獵笛

 

狩獵笛雖然係打擊武器,但係另一功用係演奏令周圍同伴獲得各種加強 BUFF。武器本身攻擊並唔算多元化,屬於容易上手既武器,適合注重支援多於攻擊既玩家。

雖然係咁,但係新手上路記得要背熟譜面先出去狩獵,做個出色既支援者。

狩獵笛出招表

 

長槍

 

長槍顧名思義主要係用極長既尖槍貫穿魔物,同時仲有巨大既盾牌作出防守,屬於攻守兼備既武器。另外長槍係無翻滾動作,取而代之就係墊步既動作,利用墊步以及盾牌突擊緊貼魔物攻擊就係長槍既特性。(雖然我淨係識一邊檔格一邊吉)

長槍出招表

 

銃槍

 

銃槍同長槍一樣係有極佳防禦既武器,但係銃槍就追加咗炮擊能力,基本上普通攻擊再配合炮擊既連續技已經可以打出非常華麗既攻擊。當中龍擊炮更加係威力巨大既攻擊,往往面對大型魔物亦都能夠給予非常巨大傷害。另外,今集仲還追加將「樁」打入魔物身體入面,再令佢爆炸既新技「龍杭炮」。

需要留意既係炮擊做成既傷害係固定的,同魔物中彈部位無關,而且銃槍會分炮擊類型,佢地既威力、彈數甚至攻擊範圍都不同,有時為咗適應銃槍炮擊類型就可能要改變打法,照以往經驗應該會分為通常、放射以及擴散三種。值得留意既係炮擊會大幅消耗斬味,當斬味變成紅色時就不能使用。

銃槍出招表

 

斬斧

斬斧係一種可以變換長距離斧頭模式以及高速攻擊劍模式既變形武器,於劍模式下攻擊會消耗斬擊槽,但係就可以使出強力既屬性解放。而斬擊槽就可以係斧模式下進行回復,幾時切換斧同埋劍模式就係使用呢樣武器既關鍵。

斬斧出招表

 

盾斧(充能斧)

盾斧(充能斧)同劍斧相似,係可以換片手劍模式以及高威力斧模式既變形武器。係劍模式下進行攻擊儲存能量瓶,再轉換斧模式釋放威力強大既高出力屬性解放斬!

值得留意既係當進行屬性強化俗稱紅盾狀態下,檔格係不會消耗斬味,而且擁有極多高階動作,例如利用變型做斧模式時檔格等等動作,屬於多姿多彩既武器!

充能斧出招表

 

操蟲棍

非常有趣既武器,所謂既操蟲棍係由棍以及獵蟲組成。本身棍擁有多段數連擊,而發射獵蟲則可以採集怪物精華,根據採集部位既不同所取得既精華亦都不同,採集後既精華會對獵人自身進行強化。另外操蟲棍係可以隨時跳躍,所以即使無高低差亦都可以進行跳躍攻擊,屬於非常用易騎乘魔物既武器。

另外蟲棍同獵蟲係可以自由組合,由於蟲棍附帶既技能會對獵蟲生效,所以要考慮清楚先好組合。當然玩蟲棍點控蟲亦都係一個重要課題,想玩操蟲棍既朋友要注意啦。

操蟲棍出招表

 

 

輕弩

同時擁有快速射擊及迴避性能特性的遠距離武器,於持弩狀態下亦都可以靈活移動,並且可以使用各種異常狀態彈藥以及屬性彈藥等等,當中仲包括輕弩專用「起爆龍彈」,係地面設置完成後根據獵人攻擊而起爆。

需要注意既係「起爆龍彈」係透過攻擊激發,激發既攻擊力越高,「起爆龍彈」既爆炸傷害就越大。

輕弩出招表

 

重弩

同輕弩相比,可以視重弩為一種類似固定炮塔火力輸出重視型武器。隨住使用既特殊彈以及武器既不同而變化,例如有類似火神機槍既連續掃射型「機關龍彈」、強力單發貫通「狙擊龍彈」等等化,每把武器可以使用既特殊彈只有一種。

順帶一提,之前有片段係機關槍式掃射魔物所使用既武器就係重弩。

重弩出招表

 

今集改動最大既中距離射擊武器,攻擊前後空隙小,利用魔物攻擊時露出破綻持續射箭進行攻擊。利用唔同裝填瓶,可以令魔物引發類麻痺、睡眠等等異常狀態。另外新加入技能「龍之一矢」威力極大,但係儲力需時。

不得不提既係今集連續片射有大改變,只要連續平射儲力等級就會逐漸上升。另外今集擴散似乎不存在最短距離,零距離射傷害同最佳距離一樣。

弓出招表

 

Price.com.hk 《魔物獵人 世界》中日英文合版價格查詢

 

回帶相關連結:

《Monster Hunter:World》全營地位置公開!

《Monster Hunter:World》最易襯衫麒麟裝任務出現條件公開!

《Monster Hunter:World》多人連線教學

《Monster Hunter:World》官方活動任務時間表

《Monster Hunter:World》PS4 vs PS4 Pro 畫面表現及流暢度比較!

 

滅盡殺手

重度魔物獵人中毒者,歷代遊玩時間破億分鐘!

追蹤

更多文章