又來到《爐石戰記》Best of Hong Kong嘅冠軍選手推薦牌組介紹啦！唔經唔覺已經嚟到第三個星期，今日為大家帶嚟嘅係冠軍選手Lawrence嘅親王賊！

卡組介紹

近期親賊真係好受歡迎呀！由於佢係一套屬於快攻類嘅卡組，節奏非常之快，往往喺十費之前就能結束遊戲，而且強度同勝率都相當唔錯，好多玩家都會拎佢嚟爬天梯，好適合月初上分用嘅。

呢套牌組其實係用以前海盜賊嚟做基礎修改出來嘅，最主要特點在於放棄左盜賊嘅招牌單卡－剔骨，取而代之嘅是凱雷希爾斯親王。用得呢張卡嚟命名當然佢就成為套牌嘅核心啦，而呢張牌有幾勁？無論遇到咩嘅對手，只要能夠起手或者二費準時出到佢，基本上就可以得到一個極大嘅優勢，如果可以做到暗影閃現回手再上嘅話，基本上就可以喺七費之前提早完結呢場遊戲。

當然有利就有弊，呢套牌嘅低費卡牌比較多，4費以下嘅牌有22張，大部分嘅手下如果未得到親王嘅強化之前質量都係偏弱，所以如果對上快攻嘅時候會比較吃力少少。另一方面，雖然係低費卡牌比較多，但絕對唔可以無腦鋪場，要保證到手牌嘅數量，因為呢套牌是無任何過牌能力，增加手牌嘅手段就只有唬爛海盜、『收藏者』夏庫同『毒化心智』薩瑞爾。所以一定要注意好手牌數量，如果唔係就會後繼乏力啦。

單卡分析

凱雷希爾斯親王

原本個個都話凱雷希爾斯親王實用性唔高，但自從親王賊嘅概念出現左之後，呢張手下即刻就成為左玩家們嘅新寵。以呢套牌嚟講手下有成23張，海盜派奇同南海水手被Buff後簡直係一個質嘅飛躍。炸雞同血啼嘅威脅性都增加左好多。相比抽起唔用2費職業法術牌剔骨同悶棍嘅代價其實完全能夠接受。而且勉強嚟講冷血同埋惡棘屠殺者都可以做到剔骨、悶棍嘅效果架。

鈷藍逆鱗龍人

呢張手下被睇重嘅原因除左佢嘅每回制強大效果之外，其實最重要嘅係佢種族。由於現時天梯上面實在有太多太牧師，牧師近期嘅人氣已經蓋過左德魯伊。呢張手下正正就可以針對牧師嘅解場法術卡，龍火藥水，避免比對面一卡清場嘅尷尬情況出現。另外佢5/5/5嘅身材其實都好唔錯，自帶隱藏嘲諷嘅佢搶到站場優勢之後嘅加攻更加係提速利器。

暗影閃現

暗影閃現某程度上係造就左呢套牌概念嘅其中一個重要元素。可以同呢張卡配合嘅玩法實在太多啦，南海水手連兩拳、親王雙buff、軍情七處密探四攻傷、炸雞勇者二連擊尾刀斬殺等等，其實因應唔同嘅場合都可以做到唔同嘅效果。

小編小建議

小編喺呢度想抽應對牧師同德魯伊依兩個目前最受歡迎職業嚟講講，首先對應牧師方面，我地呢套牌組對住牧場係會相對比較難受，如果爭取到兩次親王buff嘅話會比較容易應對，加上我哋牌組入面鈷藍逆鱗龍人同骸骨戰馬係我地對抗牧師重要利器，只要保證交換手下嘅節奏，其實都唔會太難應對。而對住德魯伊嘅話，雖然依家佢被削弱左少少，但其實整體實力來講影響唔算太大，由於大部份嘅德魯伊依家只有兩張解場，我哋盡可能以牌組低費優勢向對面血線施壓，爭取中期提前完結遊戲，特別要注意嘅係，依家有部分德魯伊會放8/4/8嘅原始飛龍，大家一定要小心唔好對手一波翻盤呀。