相隔5年《悍戰太平洋》《Pacific Rim》終於上映續集 – 《 悍戰太平洋 2：起義時空》《Pacific Rim: Uprising》，上集由機甲獵人 Jaegers 的設計，到城市中的大型打鬥都令觀眾津津樂道，特別係香港場景的戰鬥畫面都令香港觀眾落下深刻印象，究竟黎到續集會為觀眾帶黎咩視覺衝擊呢?

上集《Pacific Rim》香港場景的戰鬥畫面

一如以往，就比個懶人包大家有初步認識及溫故知新，令大家更投入《悍戰太平洋》的世界！

差d冇得拍續集

第一集導演 Guillermo del Toro (2018年奧斯卡最佳導演) 係第一集上映前已經透露想拍續集，但電影公司Universal Studios 同 Legendary Pictures 發生衝突，拍攝計劃一度被 Universal Studios 無限期推遲，最後Universal Studios 以35億美元將 Legendary Pictures 出售比中國萬達集團(點解有大陸演員景甜你懂的)，幾經波折，2016年11月正式由 Steven S. DeKnight ( 曾參與製作 Netflix 電視劇《DareDevil》)  代替 Guillermo del Toro 開拍續集，而 Guillermo del Toro 就退居幕後擔任製片一職。今集電影亦係 Steven S. DeKnight 的處女作。

第一集導演 Guillermo del Toro (2018年奧斯卡最佳導演)

Steven S. DeKnight ( 曾參與製作 Netflix 電視劇《DareDevil》)

上集講到邊

同大家簡單講下上集故仔先，2013年第一隻怪獸 Tresspasser 從海底出現大肆破壞舊金山，人類與怪獸之間大戰正式展開，一年後 21 個國家組成泛太平洋防衛軍團嚴密地監視係海底的「突破點」，防止由異次元穿過「突破點」的怪獸入侵，最後 2025年美國機甲獵人 Gipsy Danger 成功地摧毀了「突破點」，阻止了怪獸繼續侵襲，而機甲獵人計畫總指揮官 Stacker Pentecost 亦壯烈犧牲。

機甲獵人計畫總指揮官 Stacker Pentecost 壯烈犧牲

今集講d乜

突破點戰役結束後十年後，機甲獵人計畫獲得全世界肯定，成為人類史上最強大全球防衛軍團。為防止再有怪獸襲擊，泛太平洋防衛軍團號召世界各地有能力的人入伍，包括今集主角 Jake Pentecost ，亦係上集壯烈犧牲的 Stacker Pentecost 的兒子。與此同時，怪獸再度捲土從來，Stacker Pentecost 養女森麻子率領新一代機甲獵人迎撃更強大的怪獸威脅。

今集主角 Jake Pentecost ，亦係上集壯烈犧牲的 Stacker Pentecost 的兒子

泛太平洋防衛軍團號召世界各地有能力的人入伍

機甲獵人逐隻講

睇過上集都可能覺得機甲獵人無論設定以及動作都帶住日本超級機械人風味，其實 Guillermo del Toro 自小就深受永井豪筆下的「鐵甲萬能俠」影響，所以戲中機械人頭部連接身驅的出撃準備由如「朋友號」降落萬能俠頭部，以及「鐵甲飛拳」等招式都盡顯「鐵甲萬能俠」影子。至於今集雖然交由 Steven S. DeKnight 操刀，但佢係外媒訪問中亦表示所有機體設定以及動作畫面都有比 Guillermo del Toro 過目。

(左)Guillermo del Toro 化身小fans同(右)永井豪合照

以下就係今集出場的主要機體
Gipsy Avenger


Gipsy Avenger 係 Gipsy Danger 的後繼機，升級為雙渦輪引擎， 屬於 Mark 6 機甲獵人，主要武器 Chain Sword 以及 Plasmacaster 都全面升級。

Bracer Phoenix

Mark 5 機甲獵人，胸口設置離心漩渦砲，可以作出大範圍炮火攻擊，配備M19流星錘

Saber Athena


Mark 6 機甲獵人，女性化機體設計，行動力比其它機甲獵人高，配備背載式光子雙刀，必要時雙刀可合體成光子劍出撃。

Titan Redeemer


Mark 6 機甲獵人，主要配備 M19流星錘，可以話 Bracer Phoenix 的升級版。

Guardian Bravo


Mark 6 機甲獵人，遠距離攻擊型機體，配備 ELEC-16孤型電鞭，沿用 Chain Sword 設計功能，令電鞭更靈活精準攻擊敵人。

Crossover 哥斯拉丶King Kong !?

同屬 Legendary Pictures 旗下的哥斯拉及 King Kong 先後已經有電影作品，亦創造名為「Monster Verse」的電影宇宙，之後會推出續集以及哥斯拉大戰 King Kong 。

「Monster Verse」的電影宇宙

今集導演 Steven S. DeKnight 受外媒訪問時亦表示想將 《Pacific Rim》加入「MonsterVerse」電影宇宙，更可能係第三集發生，佢亦提到有冇第三集亦屬未知之數，要睇今集成績如何先再有決定，雖然 crossover 仍然係好初步的構思，但 Steven S. DeKnight 表示好希望呢個計劃可以成真，佢亦已經證實今集會留下第三集伏線，成唔成事就睇今集票房啦。