當大家打《MHW》打到悶悶地嘅時候，你可能好想離開集會區域，但又唔知轉 Game 玩咩好！其實最近好多遊戲一齊推出，例如光榮隻《進擊的巨人 2》，我原本只係平常心去開 Game，無諗過一玩就停唔到手！

我唔算係《進擊的巨人》嘅死忠 Fans，漫畫同動畫都無睇到最新一話，不過私心理由我就好鍾意里維兵長嘅配對。唔知大家會唔會同我一樣有個偏見，就係「動、漫畫改篇嘅遊戲，好多時都麻麻地」，得罪講句都要咁講 orz

不過《巨人2》都幾令我驚艷，就算無睇過故事都會 Follow 到劇情、而劇情同遊戲系統配合得非常好，令到我真係有「巨人打到黎，香港九龍新界無得避」嘅臨場緊張感（喂）

仲有，如果救唔切啲隊友，就真係會睇住佢地比核突巨人咬死（啲巨人真係睇幾多次都仲係咁樣衰呀！！），所以都咪話唔真實啊 orz

呢個 Game 唔係 RPG，亦唔係無雙系列發洩 Play（…Sorry《真三國無雙八》都已經唔係發洩 Play 了），而係貨真價實地講求技巧嘅動作遊戲。

喺遊戲入面，玩家飾演嘅係原創角色，做米卡莎同學

遊戲主線，同原著一樣，就係不斷地打…打…打…

你可能會問，「動作遊戲，咁都係斬黎斬去啫，熟能就生巧，成個 Game 都咁玩咪好悶？」嗱，悶唔悶就……好睇你點睇呀吓，《進擊之巨人》個故事係咁架嘛，故事嘅劇情就係要不斷打巨人保命吖嘛，咁樣嘅人生，唔係可以更加令玩家體驗到遊戲角色嘅絕望咩？LOL

隊友求救就要極速去幫拖～

動作非常流暢要讚

至於「熟能生巧」呢一點，啱架，玩家熟習玩法之後，應該唔難 KO 啲巨人的，因為簡單黎講，巨人致命弱點為後頸，如果係普通巨人，我玩左第一關之後都好快上手，可以一秒命中了。

鬼咩，條頸咁肥，好難瞄唔準架噃 LOL

不過，除非事態緊急，如果唔係我都習慣事先斬斷巨人四肢，咁先可以拎到更多分數以及素材！素材好重要，因為要 Upgrade 啲立體裝置、武器之類嘅嘢，全部都需要大量素材，而珍貴嘅素材通常都無得賣、要靠虐待啲巨人（？）拎返黎……所以，呢個部份其實係遊戲最難搞嘅地方 orz

所以我係無儲素材的，一路直衝 orz

殘殺巨人 play

不過，打巨人唔係一個人逞英雄嘅工作，遊戲亦需要玩家同其他團友建立好感度，咁樣唔單止令戰場上合作更加緊密，玩家仲可以學到新技能！呢一點如果係 Fans 嘅會好開心，因為角色好感度滿左之後都各自會有少少故事線喺度的～

自由活動時間就係同朋友聯誼嘅時候

各個角色開放嘅技能都唔同

同埋，遊戲唔係一路都咁沉重的，令你覺得「哼哼我真係一個好盡忠職守嘅團員」嘅部份，其實唔單止係主線劇情任務，返黎營地之後出去接嘅支線，先至係最多最攞命……目前我就無咁好心機了 orz

主線以外仲有好多野可以玩

支線任務仲可以順手開埋周邊地圖

綜觀黎講，《進擊的巨人2》固然係 Fans 必買，不過，如果係鍾意玩簡單動作遊戲嘅朋友，就可以考慮下嘅，遊戲整體不過不失啦，操作流暢度以及斬擊感都唔錯，而遊戲亦會由從頭開始帶你了解個故事，所以真心，唔知故事講乜都唔駛驚 Follow 唔到的～

同埋，你知唔知最重要係咩？

最重要係劇情超還原呀！還原到我笑左出聲！

入到裁判法庭之後，里維為咗救艾倫所以將佢打鑊甘

上面劇情之後就會見到米卡莎不斷碎碎唸鬧里維 LOL

最後大家可以參考返遊戲宣傳片～