【遊戲評測】精彩絕倫警世作品《Far Cry 5》完美演繹末世邪教

《Far Cry》(遠到喊)作為 Ubisoft 既重點系列之一,Fans 們由 2014 年尾等到 2018 年先見到正傳既續集(中間隻 Far Cry Primal 就算啦)。等咗接近 3 年半先推出既《Far Cry 5》果然不負所望,首周銷量已經達到前作兩倍,亦都成為系列歷史上最暢銷既一部。同時係 Twitch 上面既直播時間已經超過了 55,000 小時以及 1.17 億次觀看,呢啲仲要只係首周發行既數字,數字咁勁只得一個原因:因為隻 Game 真係做得好正!

玩完隻 Game 再睇返呢幅圖,就感受到製作團對既用心

 

極高畫質頂級享受

遊戲支援 4K解像度,係 PS4 Pro 既表現下,不論人物細節、周邊物件、花草、天空等等都表現優秀。另外遊戲流暢度亦都唔錯,即使多人戰鬥場面,Drop Frame 情況亦都唔算明顯,追求畫面享受既朋友可以放心。

今集畫面的確係靚

外國玩家用 21:9 Cap 既 4K 畫面,靚到嘔電

 

適當改動令玩家更易「潛入」

《Far Cry 5》入面有大量敵人據點,只要係敵人無發現你既情況下清場就會得到獎勵。同以往集數唔同,今集係非常早期就可以拎到「弓箭」,槍械既滅聲咀同樣係非常早期就拎到,令到潛入變得更為簡單,同時我亦都發現利用傭兵亦都可以達到同樣效果。當然如果想玩得刺激啲既話,我會建議你潛入基地逐個暗殺,好玩好多。

另外我係攻略過程發現,利用傭兵進攻的話,就算佢用直昇機係頭頂轟炸,系統都唔會判斷你被發現,懷疑呢個係 Bug 黎……。所以我地下面會推薦 2隻極好用傭兵比大家,建議優先解鎖。

今集掉石仔回歸返四代,即使石仔落點距離較遠敵人都會有反應,有利潛入擊殺

極早期就有狙擊槍滅聲咀,遠距殺敵一流,不過要小心敵人發現同伴屍體響警鐘

所以最好先拆晒據點內既警報器,阻止敵人增援

擊破困住猛獸既籠,幫助分散敵人注意力

無被敵人發現下解放據點,會有額外獎勵

極推薦傭兵 – 艾朵雷‧杜拉布曼,會控制武裝直升機提攻強大火力支援,墜機後會持重機槍支援,於北方區域解鎖

極推薦傭兵 – 葛蕾絲‧阿姆斯壯,遠距殺人極難被敵人發現,於南方區域解鎖

 

故事帶極重暗喻 引人入勝好比小說

今集故事表面上係描述一個邪教瘋狂既故事,但當你玩落去就發現唔係咁簡單,處處都流露出「邪教似乎係真理」既味道,似係導你入教多啲;而且遊戲內既邪教教主「聖父」形象塑造得極為出色,唔似痴線佬之餘,仲極有個人魅力,相信香港某邪教教主都會自比為「聖父」。當然主要故事就唔透露啦,但係可以話比大家聽,今次故事精彩程度可媲美為一本出色既小說,大家玩既時候記得細味。

除咗主線故事出色之外,支線故事亦都滲入大量諷刺現今社會既情節,例如當中有位 NPC 就係諷刺緊美國槍管事件,都可謂追得十分貼。

「聖父」唔似痴線佬之餘,仲極有個人魅力

玩落去你會發現佢地預計既野未必係錯

唔少 NPC 對白都有花心思,有留意國際新聞的話,相信好多位會會心微笑

遊戲同四代一樣有隱藏結局,有接觸過既應該都知點開啟,呢度就唔劇透了

彩蛋呢樣野又點少得呢?

 

戰鬥系統一如既往地出色

同以往集數一樣,戰鬥系統保持一貫高水準。係困難難度下,面對大規模戰鬥亦有一定難度。另外遊戲內 3個大區都有「聖父」既家人控制住,要解放該區域就必需打倒該區「聖父」既家人。當然每位家人(即係區域 Boss)都有自己獨有既戰鬥方法及場景,而且會該位家人既性格設定,透過戰鬥將會逐步了解邪教核心故事,淨係呢 Part 都值回票價!

如果對射擊遊戲唔太在行既玩家,可以試下用特典送果部武裝直升機,或者盡快儲錢買一架,之後就可以用強大武力去掃盪任何據點,當然咁玩法就無乜趣味性可言啦。

同「聖父」妹妹既最終決戰,雖然呢場戰鬥亦都做得唔似槍 Game,打既時候仲覺得好迷幻,但其實完全符合角色設定,做得非常出色!

特典武裝直昇機,用佢可以輕鬆掃盪任何據點

 

載具變得更易操控 小遊戲元素極為豐富

《Far Cry》系列既載具一直以黎操作難度都有返咁上下,黎到新一集明顯有改善,即使係控制飛機呢類高速載具亦都唔算太難,有玩開《Battle Field》既玩家相信會極速上手。另外遊戲入面設有極多小遊戲,當中唔少都富有挑戰性,大家不妨嘗試一下。

速度快既飛機黎到今集都變得易於操作,同敵機玩 Dog Fight 既時候仲好過癮添

要用飛機穿過每一個圈圈既小遊戲難度頗高,想挑戰難度既玩家記得要試下

點擊呢類金屬牌就可以開啟小遊戲

有部份隱藏任務必需用載具先可以到達

 

打獵系統變得可有可無

以往系列重點元素之一「打獵」,黎到今集變得可有可無。以往升級背包之類物品係需要用到動物皮,黎到今集則改為用技能點升級。以便利性黎計當然係今集系統佔優,不過趣味性黎講就比以往差,結果動物皮都係用黎賣錢就算,比較可惜。

今集改為升級又或者拾取「專精雜誌」獲得技能點數,無需再打獵升級物品

 

出奇地好玩既《Far Cry Arcade》

新加入元素,簡單講就係一個地圖編輯器,係遊戲內各大小城鎮都會搵到,又或者係開始選單都可以直接進入。由於可以自由編輯及上載既關係,好多勁人發揮創意,製作《Counter-Strike》經典沙漠地圖,又或者重現《Rainbow Six Siege》入面既大屋咁,係《Far Cry》入面玩其他遊戲又真係幾過癮。

多人對戰其實幾好玩,我爆咗機之後大部份時間都係玩 Arcade

仲有唔少有趣任務,呢個就係狩獵大猩猩

 

總結

今集個人黎講不滿既只有二點:打獵變得無必要,刪除開通訊塔元素。

今集唔需要解鎖通訊塔

 

其他部份都可以話係系列作既高峰,雖然用特別既方法可以零難度潛入,但當你用返正常方法既時候,就發現製作組今次係敵人排位上面都有花過心思。而且今集係故事上面真係落足心機,角色設計更加超越第三集既狂人,「聖父」呢個角色所營造既真實感,令你覺得係真有其人。

而且遊戲內容設計極豐富,超大量既支線任務、小遊戲,「Far Cry Arcade」甚至係釣魚等等,就算爆咗機都大把野比你做,而且仲有外國有玩家搵到隱藏野生動物「大腳八」既資訊,真正做到一隻 Game 有排玩。

《Far Cry 5》既故事、遊戲性、畫面表現都彷彿係話比新一代玩家聽,一隻 AAA 級大作應該係點,雖然 2018 年過咗一半都無,但我敢講呢隻遊戲一定係今年 Top 10!

遊戲內唔少支線任務都非常精彩,呢個任務屬必玩級數,極痴線!

 

About 森麻

VJGamer總編 (毒撚),歡迎投稿

Connect

Connect on Facebook View all Posts