【遊戲感想】《Snack World》其實好有難度!超耐玩勇者冒險全記錄☆

呢隻令我地編輯部一度陷於荒廢業務危機嘅 Switch Game《Snack World》,聽網友講市面上一度賣斷市,亦聽網友講「喂呀唔出中文版睇唔明」嘅關係,我早前亦抽咗少少時間整咗篇【Snack World 中文入手指南】黎導人入坑(笑)

而今日,由於我(幾乎)打爆機嘅關係,又因為掛住打機懶咗幾日,所以,都係時候寫篇感想文同大家分享下,到底呢個遊戲係玩乜,同埋值唔值得玩。

遊戲主線好簡單,故事一開始,你就比人冠上「勇者」之名,然後就要幫國家個皇帝以及啲平民解決煩惱咁樣;同埋因為世界觀入面有個終極大魔王,大魔王想叫條魔龍出黎,所以玩家最終任務就係要維持世界和平,促成大團圓跳起 Yeah 嘅結局。

超多任務要接

點解我寫到個故事咁 Gag?係因為《Snack World》嘅故事情節同對白,都係以輕鬆惡搞為主的;遊戲主線其實唔係遊戲重點,只係一個設定而已;真正重心,係佢多變嘅遊戲性啊(笑)

對於唔擅長日文嘅朋友,或者睇劇情呢一部份真係比較可惜,因為遊戲對白當中其實都幾多 Gag 位!同我一齊打機嘅戰友,好多時喺我解釋完之後都會爆笑……令我深深明白隻 Game 無出中文版嘅可惜之處吖!

例如係遊戲早期 Boss 八爪魚王,公主叫你打佢,係因為要佢嘅「保濕 Cream」……

八爪魚王聽完之後面紅,問你一句「點解你地會想要啲咁嘅嘢?」;原來因為保濕 Cream 嘅真身,係佢啲便便(掩面)

遊戲中好多 NPC 其實係童話角色,但係全部都係崩壞 Setting,例如白雪公主係個唔認老又扮哂嘢嘅肥婆

至於「唔肯成長面對現實」嘅Peter Pan 就係一個沉迷偶像(AKZ48 lol)嘅廢老肥大叔……

咁到底點解我會咁吹捧呢隻 Game 呢?明明係 3DS 移植加強作品,點解之前唔提,而家先當係寶?

咁一來 Switch 上面真係好缺啲多人聯機合作遊戲(可以網連嗰啲呀!),二來,今次 Switch 版同 3DS 版始終有啲唔同,玩家可以自訂角色(我班隊友就是一班偽娘…)之餘,仲包含埋 3DS 版 DLC 嘅內容,所以呢個遊戲,非常耐玩,非常豐富……同埋非常花心機!

連「一番賞」都玩埋……我成日笑班隊友,每打完一場就去 Check 一番賞進度,根本就同喺現時點度等「最終賞」嘅朋友一樣 LOL

去同「AKZ48」握手,佢送一番賞券比我 /w\

遊戲當中,有大量武器種類、裝備有大量屬性、仲要分顏色;而各個種類同顏色,分別會喺戰鬥中,針對唔同魔物有相剋作用,達至攻擊加乘效果,聽到呢度,你係咪已經感覺到「痴線,呢個 Game 絕對係坑黎」咁樣?

未止呀,遊戲另外仲有一個特性係「掉寶率」,喺遊戲入面,要整勁裝備就要珍貴素材,但係,並唔係每場戰鬥話跌乜就會跌乜的,同撞鬼一樣要講緣份!咁點樣增加撞鬼嘅機會(喂),除咗要達成「無死過、無飲過藥、隊友都無死過」呢啲變態條件之外,就要靠增加掉寶率了。

而呢個遊戲入面啲細怪,都……相當硬,相當厚血。死,是平常事~(係我地衰,我地閒閒地越 10 級打)

掉寶率除咗靠配件增加,遊戲中每日都會有「打扮加乘」指引的,如果你跟足佢建議嘅「風格、顏色、品牌」去襯衫嘅話,掉寶率就會大 Up……

但係,同一時間,即係話刷素材整裝,唔只係按能力值咁簡單,即係話你要咩屬性咩顏色咩牌子(連牌子都有呀痴線)都基本上要齊哂,先可以漂漂亮亮地當一個奪寶奇兵 orz

為咗個掉寶率,經常會出現大家著同一件衫嘅畫面

或者你見到啲人設角色圓碌碌,會輕視咗遊戲嘅難度(我舉手,因為我係 /w\),但係,如果你要我具體啲去形容呢個遊戲嘅難度嘅話……佢根本係《Monster Hunter》黎!唔係《MHW》呀,係舊版嗰啲呀!

初期都還好,去到後期啲魔物同埋 Boss,真係會打到你扯火、打到你沮喪 LOL  因為佢地啲判定又大,招式又變態,有時仲會中埋哂啲騎尼屬性,搞到你嬲又唔係、笑又唔係!

呢兩個孖妹打到我地嬲,一路狂回血,一路係咁整到我地跳舞 LOL

同埋,你以為打完一次,爆機啦?NO!這是一個很耐玩的遊戲喔!當你一度以為自己爆機之時,其實,只不過係解放咗咋!爆咗主線先係開 G 位任呀!你 50 Lv,但佢會開啲任務比你,係敵人 100 lv 架 LOL

成為死魂都要向敵人發出屍氣!(誤)

講到呢度,如果你已經玩緊呢個遊戲,有無一種「條路仲好長…」嘅感覺?如果你未入坑,又會唔會心癢癢想試下成為圓碌碌勇者打變種《MH》嘅感覺(笑)?

我就算寫完呢篇感想文,其實都仲係會繼續玩的,主線任務可以自己 Solo 解,但係同隊友合力打「探險」任的話,掉嘅素材同錢都會多啲,挑戰性又大啲,所以,呢隻《Snack World》目前都仲係我近期嘅強力推介喔!

 

相關文章:
Snack World 出 Cheat 會比王上鬧
Snack World 新手中文指南
Snack World 武器配件實體 Pack

About 神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

Connect

Connect on Facebook View all Posts