一般 Nintendo Switch 玩家應該都好憎部機一樣野，就係個原裝 Dock 包到實晒，搞到無得用手提 Mode / Tablet Mode 邊叉電邊玩，所以有好多第三方廠商推出可以睇到 NS 屏幕既叉電座。 但係有無諗過用呢啲第三方廠商既 Dock，會令到你辛辛苦苦玩返黎既 Save 消失呢？

事源係美國一間老牌遊戲周邊製作商 Nyko Technologies，佢地其中一樣產品「Portable Docking Kit for Nintendo Switch」 出事。本身呢件產品除咗可以比大家邊叉邊玩之外，仲有 HDMI 輸出，即係支援埋 TV Mode，另外仲有多三個 USB 位，就咁睇的確係幾好既。

今次事件主角「Nyko Portable Docking Kit for Nintendo Switch」

不過產品推出之後，有部份用戶因為 USB Type-C 頭出現問題，導致無法充電。之後 Nyko 更新固件並且補償比受害既用家，本來件事就咁完架啦，但係勢估唔到更大既問題出現咗。

因為之前任天堂 Switch 主機系統「5.0.0」更新，另到部份功能用唔到之餘仲有人燒埋機，當然 Nyko 既 Twitter 就不停比人問候，同埋忙於賠償比受影響人士。但係最重要既問題係，雖然受影響人士收到部新機，但係舊機既 Save 就完全無晒，大家都知道現階段 Switch 並唔可以儲存遊戲 Save 落 microSD 卡度，必需要機過機先可以轉移 Save。但係部舊機都燒咗……即係話啲 Save 跟埋部機一齊消失。

就住呢次事件，美國一位受影響人士 Michael Skiathitis 已經對 Nyko 提告，而且據消息指有問題既唔單只係 Nyko 製品，其他第三方廠商唔少都有呢個問題存在。

今次事件話比大家聽，火牛、Dock 呢類涉及電源既野都係用返任天堂認證產品穩陣（果啲黎自北方既產品，自求多福啦），想邊叉邊玩既咪用 Hori 呢隻囉！

相關回帶文章：

Hori 推出 Nintendo Switch 新USB Dock 可接駁 Keyboard！