雖然電腦版既《PUBG》（PLAYERUNKNOWN’S BATTLEGROUNDS）係 2月既時候已經加入咗新沙漠地圖「Miramar」，不過 Xbox One 版本就最近先更新，雖然遲咗少少不過都算追到，而且勝在無外掛玩都玩得爽啲啦，準備入機既朋友又多個理由啦！

新地圖「Miramar」全貌

新地圖設計同絕地島（Erangel）都幾大分別，主打密集既建築物，大量崎嶇不平既地段，務求大家有全新既體驗，並且希望玩家為呢個地圖諗新既戰術同計策。一堆人跳傘時會揀既軍事基地，黎到新地圖就位於地圖東北方，而且呢個基地個名同墨西哥一個軍事基地係同名的！不過要留意，因為基地位處邊緣地帶，所以搜括完之後好拿拿聲閃啦。

新地圖「Miramar」已經係 Xbox One 版本上線，未入機既好快手啦！（今個月仲要有隻正野《State of Decay 2》）

同場加映特別 Box Set

為咗慶祝今次《PUBG》更新，我地非常榮幸地得到由 Mircosoft Xbox 送出既特別 Box Set，呢個 Box Set 內含超精美背囊一個（質素可以媲美某數字軍事用品牌子）、製作精美既車牌一個、新地圖「Miramar」導覽小冊子、羊皮水壺、防塵頭巾，而最特別既係佢仲有一件偽裝衣！即係大家玩《MHW》裡面既隱身衣裝咁上下！

每樣都非常精美，最有心思係個遊戲 Code 擺咗係車牌下面！極配合返《PUBG》主題！

質素可以媲美某數字軍事用品牌子，用料係幾正

最正果件裝備！由神婆示範，真係著得上身的，咁既禮品真係好罕見！

著咗呢件野打《PUBG》，就算係咩環境底下都無人見到你！（唔好問我做咩用 Shotgun 狙擊）

不過呢個 Box Set 外面係無得買的，純粹比你地羨慕下咁囉 :p