「密室逃脫」呢種遊戲喺香港都興起咗一排，如果你好似我地編輯部咁，鍾意向難度挑戰、又對場景佈置有要求，或者今次介紹嘅《逃出時空 Time Escape》就啱你口味了。

我地早前去玩嘅《逃出時空 Time Escape》位於觀塘工廈入面，場內一共有六間唔同主題嘅密室，鍾意魔法學園主題嘅又得、鍾意科幻風嘅都有！不過，店員哥哥就好自豪咁話，六個主題係有難度之分的，而佢敢寫包單，就算係最低難度嗰一個密室，都真係動少啲腦筋都唔得！！

雖然睇咗咁多年金田一，我地都對自己嘅腦袋有少少信心，不過既然店員講到咁，仲話「每個密室任玩 45 分鐘，都仲係會有好多玩家過唔到關」……所以，我地最終決定聽話地由最簡單嘅主題玩起。

今次，我地試玩咗其中四個密室。

【入門等級：魔法學園 Magic Academy】

「魔法學園 Magic Academy」嘅佈置係《Harry Potter》風格，有魔法元素、有中世紀陳設、除咗房入面講明「唔掂得」嘅嘢之外，大家記得盡情到處摸、到處睇呀！唔怕你手多，最怕你唔摸！

雖然話係 Level 1，不過對於未熱身或者飯氣攻心嘅朋友黎講，要按次序解開謎題，都係有難度的！房內嘅機關設計用心，如果要我地而家比定提示你嘅話，我只能同大家講，開卷有益、書中自有黃金屋、同埋記得睇清楚題目先好作答呀（笑）

【非常用腦：消失的密室 Chamber of Secrets】

首先，「消失的密室 Chamber of Secrets」係完全唔關《Harry Potter》事的，呢個主題其實係要大家搵遺產，但要得財富，就要玩家通過考驗。呢間主題房入面，密密麻麻都係書架嘅佈置，你唔好以為淨係 Printing 咁簡單呀，少啲眼力都唔得架（笑）雖然只係 Level 2 難度，但係我地都喺呢個主題嘅最後一關卡住咗一陣 orz

拍攝效果：因為工作人員幫我地開咗燈影相先咁光猛

事實上呢個主題房非常暗，所以非常考眼力

今次呢度唔駛玩家周圍摸，主要係考你觀察力同埋邏輯能力的，想順利通關嘅話，就唔好睇少場地嘅佈置！出現得喺房入面嘅物件，一定有佢嘅原因喺度；不過諗嘢又唔駛太複雜，因為我地就係諗得太多先會卡關（笑）

【終極難度：超級武器 Ultra Weapon】

一口氣玩完兩個密室之後，店員決定比我地直接挑戰場內最新、但同時係最高難度嘅主題「超級武器 Ultra Weapon」。呢個密室主打科幻風格，不過相比起用腦，倒不如話佢考大家觀察力同埋手腳協調，仲要講少少團隊合作性，所以……小心唔好成為豬隊友呀，玩到一半搞到嗌交就唔好啦～

【中等難度：迷離鬥室 The Puzzling Blocks】

呢個密室同其他主題玩法有少少唔同，一開始各位玩家係要各自企喺獨立房間，而每個小房間都各自上鎖，而且謎題係一層接一層，少啲觀察力都唔掂。我地編輯部當日有五位成員去玩，要打開 A 成員房間嘅鎖，就可能要 C 成員提供線索、或者解開自己房入面嘅謎題，搵出各人開鎖的密碼，合作性係四個密室裡面最高既一間。

非常有囚禁 Play 嘅味道

我地成員都幾鍾意呢個主題架，因為要用腦得黎又唔算太難，作為編輯部當日嘅密室馬拉松黎講，絕對係一個唔錯嘅結尾！

當日老細同我地一齊與眾同樂，你睇下佢走得甩嘅時候幾開心？LOL

好啦，講咗咁耐，都係時候公佈呢間《逃出時空 Time Escape》嘅資料啦！

地址：香港觀塘開源道 77 號 業發大廈一期 7 樓 C 室
《逃出時空 Time Escape》Facebook
《逃出時空 Time Escape》網上預約