【試玩感想】NEXON 新作手機 Game《OVERHIT》3D 畫面超流暢炫麗#大坑注意

有玩開 Online Game 嘅朋友一定會聽過 NEXON 公司嘅大名,著名 OLG《瑪奇 Magi》就係佢地開發架啦!隨住市場形勢轉變,唔少 OLG 都改變營運平台到手機上面,今次介紹呢隻《OVERHIT》都唔例外。

作為 NEXON 重錘出擊之作,《OVERHIT》喺畫面、戰鬥、系統、人設各方面都絕對落足功夫,最重本嘅投資莫過於用 Unreal Engine 4 開發遊戲之餘,Game 入面仲有大量 3D 動畫同埋人物模組,真係聽到都覺得貴(重點錯)

咁,個 Game 好無玩呢?

故事方面,雖然遊戲世界觀係假設喺未來,不過裡面嘅美術風格其實偏向中世紀風……唔緊要的,幻想遊戲一向都係咁。世界由唔同嘅國土以及多元文化組成,唔同角色有獨立嘅故事背景,要了解全務,除咗肝,就係肝(喂)真係好睇你有無咁嘅心機。

不過遊戲目前仲未有中文化消息(得日&韓文)所以對於唔擅長日語嘅玩家黎講,故事呢一環,或者只能靠睇過場動畫或者睇漢字估估下啦(笑)

當然啦,其實唔緊要的(喂)因為遊戲性先係《OVERHIT》重點。遊戲玩法,簡單黎講,就係卡片(角色)育成戰鬥 RPG,抽到 SSR 角色唔代表你無敵的,要不斷將佢升級、進化,而呢啲素材就靠你不斷打關卡、做任務儲石黎刷十抽。

不過遊戲目前送石送資源都算慷慨,我首抽+打咗一輪之後儲多次石再十抽,就中左兩隻 SSR 了。

角色有能力值表,需要用點數開通

而角色升級或進化,就需要用角色卡了。如果抽到唔想要嘅卡,就用黎升你鍾意嘅角色吧。

純個人喜好:雖然遊戲中角色有 3D 模組,但係我覺得 2D 版其實靚啲 LOL

戰鬥方面就係採用技能輸入 RPG 玩法,技能使用冷卻完就可以再次使用;同好多時下手機 Game 相似,考慮到用家未必有充足時間打機,戰鬥係可以掛機 Auto Play 的。

不過,當所有角色同時行動嘅時候,其實畫面都會有少少令人眼花繚亂,真係勝在遊戲畫質同埋引擎靚,所以係完全無 lag 機的(我用 iPhone 8 玩)。我自問我要玩嘅遊戲太多,時間唔夠(笑),所以毫不猶豫就掛住機做野了。

《OVERHIT》對於新手送野算係大方的,每場戰鬥其實有三個額外條件,達成嘅話就可以有 Bonus;你儲到嘅 Bonus 星星越多,返出去劇本選擇畫面可以領取嘅獎勵就越多。

寫呢篇文嘅時候我都只係玩到 Chapter 3,由於太多野要升級嘅緣故,我真係唔知幾時先會見到終點,或者根本無終點……如果呢排悶悶地,不妨新鮮入手呢隻《OVERHIT》試下啱唔啱玩吖!

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章