今次同大家介紹呢隻獨立遊戲《Call of Cthulhu》由法國 Indie 遊戲工作室 Cyanide Studio 開發，係一隻單人 RPG，將於 2018 年 10 月 30 日同時登錄 PS4、XBox One 及 PC。

遊戲改篇自著名美國科學奇幻小說作家 Howard Phillips Lovecraft 的同名作品「The Call of Cthulhu（克蘇魯的呼喚）」，故事舞台為 1924 年嘅美國，玩家飾演嘅男主角 Edward Pierce 係一個退役軍人，而家嘅工作係私家偵探。

主角接到消息，位於波士頓附近，有座孤島名為 Darkwater Island，咁通常講起孤島都無咩好事，大家無理由無睇過《金田一少年歌劇院殺人事件》嘅係咪？LOL

無錯，因為居於島上面嘅著名藝術家 Sarah Hawkins 以及佢嘅家人突然一夜死亡，為咗查明呢件兇案嘅真相，主角開始隻身一人前往孤島，揚起死亡 Flag 嘅前奏。

不過，主角去到當地先發現，無論係島上嘅居民同埋警察提供嘅情報都充滿疑點，於是諗住一條友去大宅度由頭查起，點知……

遊戲用第一人身視點進行，不過，如果你以為呢個只係單純嘅查案遊戲就大錯特錯啦！首先，遊戲嘅原著小說一向都係走超幻想＋驚慄風格，所以當你開始深入遊戲時，就會開始面對唔同人嘅襲擊、暗算，甚至喺大屋下面發現神秘宗教組織，慢慢你就會明白呢壇嘢根本唔係普通命案咁簡單！

到底自己見到嘅嘢係真實、定係幻覺呢？遊戲有一個 SAN 值計算系統，如果玩家可以企硬堅強，就可以力保理智、全身而退；但係，如果你想知道事情嘅真相，甚至唔介意自己會精神崩潰同黑化嘅話，請你放心沉淪（笑）玩家最後嘅精神狀態係會影響結局的。

玩家於遊戲中亦需要學識技能例如「呼喝」「說服」等等去得到線索或證據，亦可以從遺體身上得到「醫學知識」等資料；呢啲技能有助你推劇情，而遊戲中亦會得到經驗值為自己 Upgrade 道具等等。

到底故事背後真正嘅陰謀係乜，就有待大家到時慢慢再參詳啦～