國外網友喺今次 E3 2018 上面見唔到《Dark Souls 4》或者《Bloodborne 2》都不禁表示失望，但係，同時亦對 From Software 新作品《Sekiro: Shadows Die Twice（隻狼：暗影雙死）》感到極大興趣以及期待，到底呢隻新 Game 同其他同廠兄弟作有咩系統上嘅分別呢？以下係我整理出黎嘅十個要點！

（1）有得「跳」

無論係《Dark Souls》或者《Bloodborne》都無一個「直接跳」嘅按鍵，要進行跳躍動作，就一定要衝刺之後先跳得起；有人話呢個設定係增加遊戲難度，亦都有玩家話呢個設定係變態（笑）

但係今次《Sekiro》入面就有得直接跳起，配合呢個新動作，相信地圖嘅變化都會變得更有深度（比以前更有深度，真係諗起都頭痛 orz）

（2）新增裝備「抓鉤」

玩家可以利用抓鉤快速移動到敵人身邊、或者可以更快速、更靈活地於地圖上探索。雖然件事聽落去有少少《刺客》、有少少《FF 15》（王子可以利用水晶力量快速接近敵人進行攻擊）、有少少《Batman》……

當然啦，喺探索系統上面作出新嘗試都係一件好事，呢個抓鉤實際用途有幾靈活、有幾方便、抑或會令到遊戲樂趣減低，呢一切，就要留到實機試玩先知了。

（3）隱身機制

以往《Dark Souls》或《Bloodborne》入面，玩家可以慢慢行到敵人身後進行大力背刺；而喺《Sekiro》入面嘅身份係一個忍者，所以加強咗潛行刺殺嘅元素。玩家可以在草叢、山丘、或者在牆角潛伏，睇準時機對敵人進行攻擊。

（4）唔會再有種族之分

初始遊戲嘅時候，玩家無得挑選自己嘅種族或階級（即係騎士、貴族、一無所有呢啲設定），玩家喺遊戲入面嘅唯一身份就係忍者；而遊戲喺戰鬥美學同系統方面，都係針對「忍者」嘅特性而設計的。至於能力值又會點樣分配，目前就未有更多資訊了。

（5）唔會有多元武器選擇

以往大家玩《DS》或《BB》，都有自己喜好用嘅武器吧？無論你以前用開教會錘定係路德維希聖劍，黎到《Sekiro》入面，所有玩家嘅武器就只有武士刀以及你嘅義肢（下年啲遊戲咁鍾意玩義肢 Play…orz）

你可能會話選擇少咗，但係官方就係想玩家可以將重點擺喺如何演舞你嘅武士刀，點樣活用唔同嘅攻擊技巧等等。同時，玩家嘅義肢其實係有變化的，既可以對敵人破防，亦可以噴火令敵人遲緩，而義肢技能亦可以配合武士刀使用，例如係將火加落刀身等等，連閃電紙都慳返（笑）

（6）唔會有其他裝備

無錯，遊戲係唔會有唔同裝備出現的，所有收集控嘅朋友可以將注意力擺返去戰鬥上面（笑）玩家要增強自身初始裝備嘅方法，就係不斷為義肢替換零件、改裝，增強佢嘅技能。

（7）無多人連線模式

我知呀，我明呀，我聽到好多朋友嘅哀號呀 LOL

但係，宮崎英高曾經於 E3 期間表示，《Sekiro》係一個故事性非常強嘅遊戲，作為想要為主人復仇嘅主角「隻狼」，點樣孤高地去開展佢嘅復仇之路，必須要玩家一個人玩先可以感受到故事當中嘅情感；如果多人聯機，就會破壞咗遊戲裡面嘅完美平衡咁話！

（8）復活

遊戲入面，玩家係可以原地復活的，當然復活都有佢嘅限制以及極限，但係玩家亦可以利用呢一個新要素，令敵人行返開、或者減低返戒心之後，先進行復活再對其作出偷襲，扭轉困局。呢個設定絕對係超創新！

（9）姿態（Posture）

《Sekiro》裡面嘅戰鬥方式，同平時有少少唔同，因為遊戲唔係好似平時咁直接削減敵人（或自己）生命值，而是使用武士刀，擾亂敵人嘅平衡或姿態，直接解鎖必殺一擊。

以前就有盾反或者槍反，今集玩家可以用義肢進行……義肢反（喂）去令敵人弱點暴露。戰鬥方面嘅變化係我目前最想挑戰《Sekiro》嘅原因之一。

（10）無火坐，無燈點

正如頭先上面「復活」部份所講，From Software 今次似乎想喺《Sekiro》入面試緊新嘅 Checkpoint 方式，唔再有冓火，亦唔駛點燈，反正死咗可以原地復活（笑）但係，想要升級或者整理義肢又點做呢？到底遊戲會有佢獨特嘅「火」抑或係有其他 NPC 當係 Checkpoint？呢一點就有容我們期待正式遊戲了。

遊戲預計 2019 年登錄 PS4、XBox One 及 Steam。我自己就好期待《Sekiro》啦，你地睇完以上嘅分別又有咩想法呢？