無論你係唔係 RPG 忠實 Fans，Final Fantasy 系列你點都玩過一兩集，無玩過都一定會知佢係咩黎；而今日（2 月 11 日）就係一代經典《FF VIII》推出 20 週年嘅日子。

好多年輕朋友對《FF》嘅印象都係黎自《FF7》或者再近期嘅《FF15》，但係《FF8》其實亦都係不容錯過嘅佳作，咁一來當年系列首次起用歌手演唱主題曲係一個突破，選用華人歌手王菲唱「Eyes on me」亦都令遊戲喺華語地區知名度大增，但對於玩家黎講，《FF8》嘅難忘之處，就係遊戲首次使用全等身比例 3D 人物模組黎製作遊戲，同時 Squall 與Rinoa 嘅關係、扣人心弘嘅劇本，對於身為《FF》系列 Fans 嘅我黎講，絕對係當年一個美好而難忘嘅回憶。

當年仲係 Squaresoft，未合併成 Square Enix 架！歲月～

隨住《FF8》踏入 20 週年，各地玩家同媒體都發起唔同嘅投票選舉，因為《FF8》到目前為止都未有移植落 PS4 嘅打算，所以有唔少當年錯失遊戲或者想重溫經典嘅朋友，都好希望 SIE 或者 Square Enix 會考慮將遊戲移植；同時，最好嘅，就梗係將遊戲重製啦！

不過，我同時認為《FF7》重製講左咁多年都仲係一團糟，就算而家《FF8》真係宣佈重製，個心係會開心嘅，但同時亦都知道係一段漫長嘅歲月……

而家想玩返《FF8》嘅朋友，可以喺 PS3 以及 PSV 上面經日版 PSN 下載玩返；如果呢個系列真係重製，在座又有幾多朋友同我一樣會「必玩！」呢？

最後送上當年主題曲片段：