曾幾何時，我地知道《Monster Hunter》會拍真人版電影嘅時候，我地曾經開心過一下。直到見到第一張劇照嘅時候，所有 Fans 都變晒樹熊咁嘅樣，露出一個「唔L係掛」嘅表情。

《Monster Hunter》真人電影版劇照

由《生化危機》真人電影版導演 Paul W.S. Anderson 執導，搵返佢老婆兼《生化危機》真人電影版系列女主角 Milla Jovovich 加埋《拳霸》Tony Jaa 主演嘅《Monster Hunter》真人電影版。官方宣傳海報終於出爐，兩張海報見到 Milla 拎住大龍顎大劍，而Tony Jaa 就拎把巨型獵弓，不過暫時就連一條龍嘅影都未見過！

睇落似 Cosplayer 硬照多過似電影海報，加上睇返之前官方公佈嘅劇情，《Monster Hunter》真人電影版故事講述一支聯合國部隊去錯異世界，要協助異世界人民同魔物戰鬥(？)，防止魔物透過異世界入口侵襲地球。(？！)

美國上映日期就定左喺今年 9 月 4 號，不過聽完個故事簡介，唔知 Fans 仲有冇興趣入場睇呢？