【遊戲評測】近年最強懷舊遊戲《Fast and Furious Crossroads》充滿電影感的大伏

《Fast & Furious》電影系列相信都唔洗點介紹，早排出嘅改編版遊戲《Fast & Furious Crossroads》（玩命關頭：十字路口）喺外國同樣地備受討論，不過就係討論隻 Game 有幾「伏」。一隻喺最初公開時，請到 Vin Diesel 同 Michelle Rodriguez 二位主角黎做宣傳嘅遊戲，加上以團隊飛車同攻擊敵車為重點，落得咁嘅結果都真係幾值得討論，所以等我地試下同大家分享到底衰乜啦。

《Fast & Furious Crossroads》由曾製作《Project CARS》系列嘅 Slightly Mad Studios 開發，官方將本作列為競速及動作角色扮演遊戲。遊戲有自己嘅原創故事，並且使用各演員嘅真人模組同配音。玩家扮演新角色 Vienna Cole 同 Cam Stone，主要劇情都係聯同《FF》系列主角對抗罪犯。

先講一講畫面，以賽車競速遊戲黎講，成隻遊戲只有主角群同敵車嘅外觀係合格。不論係場景背景定係街道，都充滿住濃厚 PS3 早期遊戲嘅味道。再望一望人物模組，三位電影主角面貌都仲叫認得出，二位新角色面相只能用「慘不忍睹」黎形容，再睇埋角色身體模組的話，真係想問句「先生你邊位」。

汽車模組算係唔錯

不過人物模組就出晒事，大佬你邊位阿

唔識講，自己睇

呢個係成隻 Game 做得最好最 PS4 嘅畫面

遊戲畫面表現差，作為競速遊戲最重要嘅元素「操控感」同樣大鑊。整個遊玩過程入面，我覺得自己好似揸緊一部快速移動嘅裝甲車，高速轉彎時感覺就好似用力掉舊鐵埋牆咁，然後如果你以接近水平角度炒車的話，又唔會話減速減得好勁，玩到「R」晒頭。另外作為賽車遊戲，竟然無「咪表」呢樣野，所有速度都係得個「估」字，真係一大敗筆。

呢段簡直係成隻 Game 最出色嘅部份，差唔多踩實油門就搞掂，幾 User Friendly !!

玩法方面，玩家可以喺任務過程中切換操控角色，而且每個角色都有自身對應嘅武器，例如 Vienna 係勾爪、Cam 可以 Hack 人地系統。本身呢個概念係幾有趣，但唔知係咪遊戲太忠於電影嘅關係，成隻 Game 劇情長度得 4-5 小時，仲要係超級線性，又無任何探索空間。例如有個任務係要你撇甩警車返屋企，但係路邊整晒石頭擋住，完全無得爬山要你大致跟返條公路行，成件事真係搞到我幾無癮。

換角色玩呢下係唔錯嘅

遊戲問題多多，但又唔係一無是處。遊戲整體表現著重電影感多過遊戲性，劇情入面有唔少特技飛車追逐畫面，好似喺巨型郵輪同航空母艦上飛馳、追截武裝火車、公路上同大型氣墊船對決等等，都係非常適合喺電影上出現嘅畫面，而且最後一個鐘嘅劇情係頗有《FF》系列果種瘋狂味道，叫做拎返個尾彩。

其他地方麻麻，不過電影感就做得唔錯

追截武裝火車

逃難一幕係幾有睇戲嘅感覺（畫面另計）

Online 對戰部份係完全失敗嘅設計，機制係警察 vs 壞人 vs 英雄三方 9 人對戰，喺一條單向賽道上互相攻擊，以擊破敵方陣型為目標。問題係賽道無乜彎位，基本上係全速直衝，真正發動攻擊時機唔多，結果場場都係去到終點停車場度玩「碰碰車」決勝負，真係好耐無玩過咁白痴嘅賽車對決，諗出黎果個應記一功。

停車場「碰碰車」大戰！

最後呢部份就屬於個人猜測，遊戲時間線係發生喺第八集與第九集中間，遊戲中 Roman 嘅一句對白已證實呢點。《Fast & Furious Crossroads》扮演二位新角色嘅演員雖然唔係啲好出名嘅演員，但絕對唔係無人識果隻。扮演 Vienna Cole 果位叫 Sonequa Martin-Green，代表作品有電視版 Star Trek 角色 Michael Burnham 以及 The Walking Dead 入面嘅 Sasha Williams。扮演 Cam Stone 果位叫 Asia Kate Dillon，即係 John Wick 3 入面果位「判官」。又因為《FF》系列一直都強調「家人」呢個概念，喺遊戲最尾嘅劇情就正正係講佢二位成為家庭嘅一份子，所以二位新角色極有可能會於第十集出現。