【遊戲攻略】操龍系統詳細解說 《Monster Hunter Rise》必學進階技巧做操龍大師

《Monster Hunter Rise》都出咗陣,大家都應該上晒 HR7 等更新架啦,但係不論街場定朋友,絕大多數人都唔了解今集新系統「操龍」系統,只係識基本嘅動作,而官方亦無詳細嘅解說,所以今次就出返篇操龍系統詳解以及進階技巧教學,齊齊做真正嘅操龍大師!

 

 

正式講技巧前,要先講下操龍系統構成,例如點樣達成操龍狀態,係咪每條龍只可以操一次等知識。要達成操龍狀態有四種手段,分別係:

 

鐵蟲絲技或跳躍攻擊

用每種武器都有嘅鐵蟲絲攻擊技又或者係跳躍攻擊(如高低差空中攻擊),成功儲蓄操龍值的話喺傷害數之下方會出藍色特效,累積到一定程度後即會進入待操龍狀態。

 

 

使用環境生物「傀儡蜘蛛」

喺每個場都有唯一一隻環境生物「傀儡蜘蛛」(可以喺地圖中查看位置),執咗之後會出現喺道具欄,對目標大型魔物使用,只要蜘蛛噴中目標就會進入待操龍狀態。不過要注意唔好喺魔物處於憤怒狀態中使用,因為喺憤怒狀態下此道具係無效的。

 

 

肉體激烈碰撞引發

當在場大型魔物超過一隻時,就有機會引發爭奪地盤狀態,雙方打完之後較弱勢的一方就會出現待操龍狀態。玩家亦可以利用環境生物「臭臭鼬鼠」,喺大型魔物附近使用,成功的話魔物頭部會出現臭味特效,呢個狀態下佢會一直追住你,時間大約分半鐘咁上下,只要你引佢去其他大型魔物度就會大機會引發爭奪地盤狀態。又或者用環境生物「子泣雉雞」,功效係吸引一定距離嘅大型魔物前往使用道具位置,成功的話同樣可引發爭奪地盤狀態。

 

 

操龍火車技撞爆

呢個方法係你本身已經操緊龍,然後見到你想操嘅目標之後按 Y 制用「突擊離脫」一野車爆佢,成功的話被撞一方將進入待操龍狀態。不過因為使用「突擊離脫」後會脫離操龍狀態,所以撞之前最好用輕、重攻擊打多幾下先脫離將傷害最大化。

 

 

基本上要達成待操龍狀態離不開以上四種方法,但其實呢個狀態都仲會細分為兩個計法。要先理解操龍同麻痺、閃光等異常狀態一樣,中完一次之後就會有抗性。例如首次操龍只要中大約 2 – 5 次有操龍值嘅攻擊(鐵蟲絲攻擊技、跳躍攻擊)就會進入待操龍狀態,操完一次之後會進入操龍 CD 狀態(冷卻時間),CD 時間每條龍不一,大約 5 – 15 分鐘不等。CD 時間過後第二次要大約打中 10 – 16 次有操龍值嘅攻擊先會再進入待操龍狀態,不過呢個法則只限打擊+傀儡蜘蛛。

 

 

外國有玩家以及編輯部都測試過打擊+傀儡蜘蛛係屬於 A 操龍系統,爭奪地盤屬於 B 操龍系統,兩者係分開計算的。喺多次測試下,同一目標 CD 完結後使用 A 操龍系統無法進入待操龍狀態,但係轉用 B 系統則成功。例如測試對象鐮鼬龍王首次操龍完結,經過 10 分鐘 CD 後,使用多次打擊+傀儡蜘蛛皆無效,但利用第二隻大型魔物引發爭奪地盤則成功進入待操龍狀態,證實的確存在兩套計算系統(試過其他龍結果係掉返轉,B 唔得 A 得),詳細參數就等神人搞啦,我地只要理解個機制就 ok。

 

 

 

睇完相關知識,正式進入技巧篇。由於操龍時所有動作都係取決於你所擁有嘅翔蟲數,所以進行操龍前最好先執到自己翔蟲數 3。操龍時一般分為:將目標撞牆、用其他大型魔物攻擊目標,呢兩種行動,先講簡單嘅撞牆。

好多人遇到嘅情況就係明明自己身上有剩餘嘅翔蟲數,但係撞一下就落地。呢個係因為當你令到目標撞牆後,就會進入撞牆模式,撞牆要立即按 B 受身,之後有大約 3 秒時間進行下一次撞擊,如果係呢個時限內無撞就會強制落地,一般黎講可撞牆次數 = 翔蟲數+1。另外係撞牆模式下,你會發現除咗按 R 移動之外就只剩撞牆一個動作,暫時未有解除撞牆模式方法。

 

 

操龍嘅移動方式好多人都唔習慣,其實只要當係玩車 Game 咁,R 制係油門,左菇係軚盤,成件事就明晒。操龍時可以做嘅動作同樣係取決於翔蟲數,使用攻擊技會消耗翔蟲數,而且不論用輕定重攻都有非常大嘅硬直,所以最簡單嘅做法係攻擊命中後立即按 B 迴避取消硬直,再進行下一次攻擊,而每次命中都會增加超必殺技槽,滿咗就可以出超必。(順帶一提,被敵人擊中斷招的話會扣操龍時間的)

 

一般人最常犯嘅錯誤就係打完有超必就即出,咁做係非常之浪費。操龍對決期間,只要重攻擊命中目標的話,對方多數都會倒地,所以要最大化全隊傷害的話應該要延長對決時間。我嘅做法係重攻擊 2 – 3 次,喺超必槽接近滿時停手,等待硬直完結後按 R 移動回復翔蟲數,然後再攻擊多 2 – 3 次(最多試過打咗七下),等超必槽倒數接近完結時按超必或者用突擊離脫撞去另一條龍令對方進入待操龍狀態,然後再操龍撞牆,然後成班隊友就有勁長嘅歡樂時間了。(撞牆最好撞返同一位置,方便隊友集火)

 

除咗以上技巧,有無發現就算操同一條龍啲招會有分別呢,其實每隻大型魔物都有超過一招的,而且部份招式唔係得一段。以金獅子為例,普通重攻擊係揮拳一下,但如果 Keep 住再撳重攻擊的話係會有第二第三第四 Hit 的,另外按 ↓+A 的話仲會用招牌技「超級大嘴炮」!測試下每隻大型魔物都會有普通 X 同 ↓+X 、普通 A 同 ↓+A 四招,攻擊距離、特性、傷害都有分別,呢個就留返等太家慢慢發掘了。個人特別推薦有雌火龍普通 A 掃尾上毒加 ↓+A 火異常,雙狀態下傷害驚人,另外金獅子嘴炮 Combo 同怨虎龍 A 連打 Combo 都非常強大,而鐮鼬龍王就非常有驚喜。

 

以上就係今次嘅進階技巧教學,希望大家操得愉快!

 

其他相關回帶文章:

【遊戲攻略】新手獵人小知識技巧 《Monster Hunter Rise》教你地圖長期顯示道具等設定

【遊戲攻略】六分鐘激賺十八萬 《Monster Hunter Rise》快速賺錢法變富翁其實唔難

【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著

 

滅盡殺手

重度魔物獵人中毒者,歷代遊玩時間破億分鐘!

追蹤

更多文章