手痕想買 Game 時大家都會上 Store 又或者出 Game 舖行下望下，但係好多時見到唔識嘅遊戲就會直接 Skip，咁就有機會錯過一啲好遊戲。今次介紹嘅遊戲《Phoenotopia: Awakening》藉藉無名，中文媒體亦從來無介紹過，但係佢喺評分網站 Metroidvania Review 得到滿分評價，Steam 上得到極度好評，而且喺外國玩家群中一致讚好，絕對係一款不容錯過嘅佳作！

《Phoenotopia: Awakening》由 Cape Cosmic 製作，本身係一隻免費網頁遊戲水平作品，後來以佢做藍本重製變成而家呢款作品。分類係類惡魔城橫向動作遊戲，不過實際上佢更接近於仿二代薩爾達嘅動作解謎角色扮演遊戲。遊戲劇情主軸都係挺身拯救世界果類野，不過中間會慢慢接觸到世界嘅秘密，過程戲劇化兼精彩（有黑暗元素），而且間中穿插溫馨感人、引人會心微笑嘅情節，可見製作人之用心。

城鎮設計類似《Valkyrie Profile》，以橫向卷軸型式表示

遊戲以像素風格，雖然線條唔精細，如果同《Dell Cells》之類相比畫面明顯較粗糙，幸好色彩配搭得好，整體睇落去都好舒服，加上身體動作細節生動以及場景配合，越玩得耐就越覺得正。另外不得不提嘅係本作音樂係極高水準，喺每個地區都有相應嘅音樂帶動玩家遊玩感受，有興趣嘅可以聽下 OST。

戰鬥系統有別於傳統橫向動作遊戲，加入魂系遊戲精力計，不論翻滾、衝刺、揮棒攻擊等動作都要消耗精力。有趣嘅係呢隻遊戲普通攻擊傷害係低到爆炸，要利用如「彈弓」、「炸彈」等工具幫助戰鬥，例如引敵人去撞炸彈等，基本上了解各種道具用法同策略遠比硬打更為重要，而且敵人識得用 Combo 連擊屈死你，硬打點都唔係好選擇。另外補血係類似《Monster Hunter》咁要拎起慢慢食完先會補，睇準時機再決定下一步做咩係呢款遊戲嘅趣味。

戰鬥以外，遊戲中有大量謎題，而且內容極多元化，外國玩家更評價謎題設計比起薩爾達做得更好（仲好容易卡關）。同時有釣魚、學必殺技等元素，可玩要素非常多。不過呢隻遊戲嘅迷宮係無地圖顯示的，純粹靠記億玩，美中不足。

《Phoenotopia: Awakening》Nintendo Switch 版本舊年 11 月已經推出，之後 PS4 同 Steam 版本緊接推出，Xbox Series X|S、Xbox One、Windows 10 版本就會於 8 月25 日推出，支援 Xbox Play Anywhere。