【遊戲介紹】生活模擬角色扮演 《HARVESTELLA》農耕畜牧釣魚溝迷宮打怪冒險

之前推出嘅遊戲《天穗之咲稻姬》,以農耕種米溝橫向動作,成功引起熱潮,亦受到玩家們喜愛,同時啟發其他廠商發現農耕溝戰鬥有得做。SE 喺琴晚「Nintendo Direct mini Soft Maker Lineup 2022.6.28」就宣佈推出新作《HARVESTELLA》,同樣係玩農耕溝戰鬥,不過就更多元化玩法更豐富,都幾吸引。

 

 

《HARVESTELLA》由 SQUARE ENIX 開發,係一款結合農耕、生活、交流、冒險嘅角色扮演遊戲,採用第三身視點,開放世界。故事講述世界由四粒「季節晶石」控制四季,所有生物都受到佢嘅祝福。好景不常,季節晶石出現異變,喺四季交替間出現名為「死季」嘅現象。當死季出現時大氣中會充滿不明塵埃,威脅所有生命,人類甚至無法外出。玩家所扮演嘅主角就喺死季期間甦醒,為咗生存過住邊耕作邊冒險嘅生活。

 

 

遊戲主要分為農耕畜牧生活同冒險戰鬥兩種玩法,每過三十日就會有一次季節交替,切換兩種玩法。農耕畜牧部份可以喺農田栽種作物、飼育家畜、悠閒釣魚、交流結識夥伴等等,收成後可以將作品賣錢或者換成製作用素材,亦可以用作料理,而呢類料理具有恢復 HP 或加 Buff 等效果,對冒險好有幫助。

 

 

冒險戰鬥部份,有大量地下洞穴、迷宮探索,可與夥伴組對攻略,用即時戰鬥方式。戰鬥中可隨時切換職業,針對敵人弱點攻擊,成功的話會發動「Break」製造更多輸出。目前已知會可即時切換發動迅猛劍技嘅「戰士」、用雙劍造成致命傷害嘅「影行者」、擅長魔法攻擊嘅「賢者」等,之後會有更多職業,玩家可自行組成啱手型嘅戰鬥組合。

 

 

《HARVESTELLA》預計於 11 月 4 日推出,對應平台為 Ninetndo Switch 及 PC Steam,支援繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章