Netflix今日正式宣布，劇迷們等到頸都長嘅燒腦神劇《黑鏡》（Black Mirror）第五季，將於6月5日正式上線！2018年底推出嘅互動式電影《黑鏡：潘達斯奈基》唔單止顛覆大家嘅傳統煲劇習慣，但翻睇再翻睇都仲係到喉唔到肺！事隔五個月，《黑鏡》第五季預告片終於喺今日正式出爐！更意想唔到嘅係，預告片為大家揭曉第五季嘅重量級卡司，以及令人意想不到嘅科幻主題！

一條兩分鐘都唔夠嘅預告，畫面一開始就感受到有股《黑鏡》獨有嘅高壓緊張氣氛，每個人都低頭眼定定盯住電話，令人屏息靜氣。《新福爾摩斯》演員Andrew Scott 震住對天鳴槍，似乎要警示世人，警醒觀眾們科技已經佔據咗大家嘅生活。同時，《黑鏡》第一到第五季嘅製作人Charlie Brooker希望觀眾用心感受全新三集，從而重新審視科技與未來，以及同我地身處嘅世界之間環環相扣嘅關係。

近年粉絲好鍾意喺預告入面，盡量猜測大部分故事內容，眼利嘅粉絲一定會留意到今季嘅卡司星光熠熠，包括於《復仇者聯盟》系列飾演「飛隼」嘅「準‧美國隊長」Anthony Mackie 同埋喺《水行俠》入面飾演反派「黑蝠鱝」嘅Yahya Abdul-Mateen II。現實生活可能無咩機會睇到 DC 大戰 Marvel，但今次兩路英雄各派代表，喺《黑鏡》入面演技大鬥法，相信會擦出唔少火花！另外，喺《新福爾摩斯》飾演大魔王「Moriarty」一角而聲名大噪嘅Andrew Scott，同埋樂壇小天后Miley Cyrus亦將會係今季切磋演技！仲有22日，等多陣啦喂！