【遊戲感想】套上日本武士外觀嘅簡化版刺客《Ghost Of Tsushima》過份著重黑澤明式鏡頭而忽略細節

 

VJGamer 作為遊戲香港遊戲媒體之一,榮幸地得到 SIEH 邀請可以優先暢玩於 2020 年 7 月 17 日推出嘅 PS4 獨佔遊戲《Ghost Of Tsushima(對馬戰鬼)》,以下感想內容並無劇透,各位讀者可以安心服用。

呢隻由曾開發《Infamous》系列嘅 Sucker Punch Productions 製作、打正旗號向日本武士道及黑澤明導演致敬嘅「鬼佬製日本古代遊戲」,自 2017 年公佈之後一再延期,終於黎到而家,喺《The Last Of Us Part II》近乎全球炎上之後推出。

爆機一周目嘅最大感想係,假如《Ghost Of Tsushima》只係一隻登錄於 PS4 上面嘅普通遊戲,或者我會對佢要求無咁高;但係當 Sony 將佢包裝到大作一樣推介時,我看待佢嘅眼光自然高了兩分。

但係,結果出到黎又點呢?

如果唔係有呢一隻《Ghost Of Tsushima》,我都唔知 Sucker Punch 工作室原來咁鍾意 Ubisoft。遊戲可以話係向 Ubisoft 旗下嘅《Assassin’s Creed》以及《Far Cry》系列致敬一樣,上至戰鬥系統,下至探索部份,真係處處都見到其他作品嘅影子。

如果睇遊戲宣傳片,大家好可能會有種錯覺,以為「《對馬》係一隻武士戰鬥遊戲,講求玩家動作技巧」;但係實際上,佢只係一隻披上左武士外觀嘅《Assassin’s Creed》,不過就似乎係一隻劣化版,因為學得最足嘅係「多 Bug」嘅部份。

 

比水淋都唔濕!

 

《AC》有啲暗殺都要用腦,某啲頭目戰亦需要考玩家技術;但係《對馬》個暗殺相較起來,真係粗糙太多了。

遊戲中嘅敵人種類及攻擊方式,實在太千篇一律,除左部份營救人質任務需要比較小心之外(因為大動作會驚動所有敵人,會殺死人質),其他戰鬥,九成九真係衝入去無雙就得。前題係我已經一開 Game 就玩緊最難,亦無刻意練 Level。

無刻意練 Level,唔係因為我對自己技術有信心,而係《對馬》係一隻非常考人耐性嘅遊戲,佢嘅支線任務繁多,只係內容大多一式一樣,就係狂打蒙古兵,有時打下強盜咁。

 

救完啲 NPC 佢地會話你「做乜要咁暴力」

 

奈何戰鬥樂趣唔多,雖然遊戲推出前講到有好多變化,實際上呢,每個戰區一兩個「將領頭目」,然後一堆雜兵,雜兵再分兩枝槍、兩個拎劍、兩個拎箭、兩個拎盾……好似種類好多,但我無論招式有無提昇都好,夾硬要「正方 + 三角」破防一樣係無痛過關。

 

 

一條 Fomula 用哂落 90%嘅任務入面,當然呢樣野唔係 Sucker Punch 獨有嘅毛病,不過,咁樣嘅設定,的確會令玩家玩到有些許麻木。

同時,啲 AI 寫得好蠢,佢地有時離到好遠都會見到你,但你動作太快(讚自己)衝到佢面前時,佢可能因為系統反應唔切,你居然仲可以兜口兜面暗殺佢⋯⋯真係好微妙。

 

喺敵陣開寶箱,佢會乖乖等你開完先再 load 機決定打你

 

戰鬥視角可以用「令人震驚」黎形容。一個動作遊戲,戰鬥之時一定會有所移動,呢個時候,接近玩家視角嘅建築物、花草等擺設理應會變成透明,因為唔可以、亦唔應該阻擋玩家嘅視線。

但係《對馬》戰鬥之時,經常令到我扣血嘅,唔係因為我擋唔住敵人嘅迎擊,而係唔知做乜入左花叢樹林,打打下人變成一堆花喺我眼前,搞到我經常要手動轉視角⋯⋯⋯真係 Am I a joke to you?

 

我戰鬥時嘅畫面

 

慶幸遊戲延期,如果《對馬》當時真係同一樣以日本古代為背景嘅《SEKIRO 隻狼》同期出,或者,近啲,《仁王 2》,(利申:實際上絕對無可能咁比較,《對馬》差好多級)咁多瑕疵,真係由出廠嗰一刻就已經鞭緊自己屍。

 

不過呢個場景咁似《SEKIRO》馬騮山

 

一式一樣嘅唔止任務,仲有 NPC 嘅樣。「村民唔係咁諗」唔緊要,最慘係成個對馬島嘅 NPC 九成九係一樣樣,我諗大概成隻遊戲得十個 NPC 模組,一條村已經有一打生得一樣樣嘅人……敵人亦都同樣。

基本上,除左有動畫出嗰啲角色叫有樣睇之外,其他 NPC 啲樣真係幾一致。唔知咁係咪因為喺外國人眼中,亞洲人全部都扁口扁面兼面目模糊呢?

 

頭目好似樣

 

之但係,就算主要角色群多戲份、有樣睇,都唔代表佢地個模組整得好睇。我明呢個係一個「武士抗蒙古軍」嘅故事,但係唔代表啲角色就一定要係阿叔阿伯 Auntie 樣。

真係要講嘅,惟有話女主角(?)有少少似日本組合 AKB48 前成員秋元才加,夫人個樣有少少似山寨版老化劉嘉玲……整體人設真係唔算太吸引。

 

結奈算係女主角

啲面相…

 

人設唔吸引唔緊要,如果你動畫好睇,劇本生動,或者我都會投入到。奈何《對馬》嘅故事頗為刻版沉悶,而過場動畫角色嘴型同對白唔夾之餘,仲好似打咗過量 Botox 一樣面癱。

 

笑住話自己就黎比人殺(?!)

行行下會縮埋一舊,應該係 Bug

 

唔知係為咗營造歷史感,導致劇情流向緩慢,對白同埋情節都發展得頗慢,動畫做得唔算好睇,但係又無得 Skip,真係令我有啲無奈。

不得不提遊戲中嘅「打獵」。玩家要 Upgrade 武器及裝備就必須要收集各種素材,呢啲素材就隨街都執到,無論係比火燒到爛哂嘅村莊、或者窮到無飯開嘅農民屋企,都會有隨地擺嘅素材。

但係個打獵系統⋯⋯或者我都唔應該叫做系統,因為遊戲裡面黎黎去去可殺嘅動物,主要係得野豬同埋熊,用箭射嘅傷害值仲高過用刀劈,跌嘅素材亦都只有獸皮。

玩過《Red Dead 2》嗰啲打獵,真係會笑住面對《對馬》嘅所謂打獵。《Red Dead 2》打獵都要講射殺咩部位,想有最優質嘅獸素材就要精準爆頭,如果亂斬一通,獸皮花哂,就未必用得,或者唔值錢。

如果你淨係得咁少動物可以殺,殺完撳個 R2 制「獲得兩塊獸皮」就叫「打獵系統」嘅話,真係未免太粗線條了一點。

 

好多支線可以解、好多外觀(轉顏色)

 

至於遊戲經常強調要向「武士道」及「黑澤明」致敬,利申,我對兩者嘅認識唔算深,後者嘅電影我亦只係睇過《姿三四郎》《羅生門》以及《亂》而已。不過我都好想知道,日本方面嘅玩家,對於《對馬》要求主角作為名門血統武士,居然「屈服現狀玩暗殺」會有咩睇法。我知係劇情需要,但如果你真係向一種國粹級嘅精神致敬,你咁樣重新定義演繹佢,真係唔知算唔算一件好事。

至於黑澤明元素⋯⋯係,遊戲好努力地用畫面、鏡頭去表現疑似日本武士電影嘅質感。可惜,景色大多重覆,所有民宅亦一模一樣,某啲部份都仲可以勉強叫風光如畫,只係遺憾地所有野都係遠睇誇啦啦,近睇就會見到材質嘅粗糙。

 

遠睇畫面好靚

啲材質貼到有直線邊嘅 wwww

 

 

係咪慢鏡、遠鏡及近鏡交接就叫做「黑澤明」呢?兒戲嘅戰鬥模式,又真係見證到「黑澤明」嘅暴力美學嗎?呢一點,留待各位玩家慢慢感受。

 

黑澤明式對戰鏡頭

 

然後,遊戲強調嘅領航設定「引路的風」。可能會有玩家覺得好方便,不過我相信打開機嘅朋友無理由唔識睇地圖,而要靠「風」黎同你講「喂喂行呢邊先係呀」先會識得探索。遊戲好強調「風」嘅元素,啲風大到我入左屋,件披肩都仲喺度飄,令我驚覺原來「蒙古攻日」時原來仲打緊八號風球⋯⋯

遊戲做得最出色嘅,可能係「攝影模式」同埋「黑白模式」,因為黑白畫面下遊戲嘅瑕疵會於視覺上減少,但係用呢樣野黎讚一隻遊戲,真係未免有少少可惜。「攝影模式」就非常用心,角度、光線、用咩鏡頭、Filter 等等都有得自選,要截張「呃到人」嘅靚圖絕對無難度。

 

 

但係,我相信玩家入手呢隻《對馬》並唔會係一心為左玩「攝影 Simulator」,就算做得再仔細,都只能夠算是陪襯吧。

寫到呢度,似乎多數都係講緊遊戲嘅缺點,因為遊戲 Trailer 展示出黎嘅,同我實際上玩到嘅,真係有啲落差。

不過,撰寫此文時,疫情再度爆發,唔少朋友要 WFH。假如你真係好悶、假如你今年未有新《刺客》玩而感到若有所失,仿製品都 OK 嘅話、又,假如你好有「清支線強逼症」,將一個地圖全踏爆就有成功感的話,《對馬戰鬼 Ghost Of Tsushima》依然係有佢嘅價值喺度嘅,因為佢好漫長好耐玩,或者都係抗疫期間消磨時間嘅選擇黎。

P.S. 最後,雖然篇文寫到咁樣,但係我愛 SIE!我愛 Sony!LOL

編輯部評分:5.5/10

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章