都唔知係咪因為日本仲播緊既日劇《真田丸》既關係，之前 Capcom 就話出《戰國 BASARA 真田幸村傳》，而家就到拎正牌同日本 NHK大河劇合作既光榮出《戦国無双 真田丸》，其實洗唔洗咁多無雙類既 Game丫……

《戦国無双 真田丸》係以日本戰國時代名將「真田幸村」一生為主題既戰術動作類型遊戲，故事由真田幸村處男下海跟隨佢老竇真田昌幸出征，直到大坂之陣 GG既人生 48 年生涯長篇故事。特別之處係玩家會隨住幸村BB成長，會根據時代既不同而以不同年齡既面貌登場。例如話有青澀既「少年期」、型棍「壯年期」等等，就算佢老竇昌幸都會有「青年期」既面貌登場。

幼齒期既幸村BB

壯年幸村

青年真田昌幸

根據資料呢，隻 Game 就唔係得齋劈既，會有「城下町」呢個元素。玩家就可以係對應時代既城下町同居民進行交流、物資調度、鍛鍊武藝、執行任務等等，而且仲可以出去探索地圖收集道具，而係城下町所做既都係為咗係長期會戰得到優勢而準備。

城下町日夜樣貌

長期會戰 & 會話

 
長期會戰係由多個戰場所構成，係會戰中會有即時既日夜變化，真係由朝打到晚。根據玩家係戰場上面既活躍程度會影響其他戰場既戰況，希望會回歸類似真三國無雙三果陣趕到死既設定啦。另外除咗真田家參與既會戰之外，係其他地方發生既會戰玩家都會有機會參與，係有得操作其他無雙武將既，我就希望有島津家玩啦，遊戲暫定於 2016年發售，會有 PS4 / PS3 / PS Vita 版本。