本身預定 2017 年 3月發售既老任新機「Nintendo Switch」大家都超期待，同時大家亦都估計係 2017年推出老任自家製大作《薩爾達傳說：荒野之息》會係新機護航作品之一，話晒之前 E3 咁大陣仗。不過根據最新消息《薩爾達傳說：荒野之息》可能趕唔切做護航作品啦。
曾經多次爆堅料，任天堂資深内幕人士 Emily Rogers (又稱老任內幕界 LO哥) 爆料話係 9月既時候知道《薩爾達傳說：荒野之息》本地化既工作比起當初預期既多；到咗十月既時候已經甩咗schedule；而到 11月既時候 Emily 就收到風話大約要到今年 12月尾先搞得掂，而且搞掂晒本地化之後仲要 Test 多 4-6個月先可以正式出街，基本上已經可以肯定趕唔切 3月新機既發售日期架啦。
另外外媒 Eurogamer 就透過其他渠道收到一樣既風，所以都幾可以肯定今次呢單係堅料黎，不過《薩爾達傳說：荒野之息》之前都只係講到話係 2017 年發售，無講過確實日期咁你又吹佢唔漲既…..咁黎緊首發護航作相信 Mario 要獨攬大旗啦，除非 Switch 等埋林克先出囉，不過都係果句啦……買就實買架啦，爭在幾時買嗟！
VJGamer總編，細細個已經蒲機舖，機齡甚深，熱愛電玩文化。