前排，無聊行入信和睇game，喺一個唔起眼位置，見到一隻值崩game—就係《戰國BASARA之真田幸村傳》；呢隻game，小弟都有買，心諗，點解跌到咁，買時畀5嚿，今日平到嘔。

上年日本播完真田丸，到今年都未hit完，但點解呢隻以真田三代做主打嘅game，反而值崩成咁？諗深一層，隻game自買完番屋企打咗幾關，的確已經無再開過，會唔會係有啲嘢已經改變咗，機友自己唔發覺？

無錯，無雙已經死咗。

唔知大家有無發覺，近年好少人話要玩無雙，就算會出大亂鬥有新角色，自問面對嘅心境已經唔同咗；同樣控制緊「真田幸村」，著住六銅錢天下第一兵盔甲好似高順咁衝鋒陷陣，但到玩玩下跌落個窿死咗時先驚醒，點解無雙會跌死嘅呢？因為，其實我已經玩緊《仁王》。

可以咁講，小弟之前完全唔玩DS類，對上嗰隻已經係講緊《Devil May Cry》，係個典型無雙人。

無雙人有咩特質呢？就係呃自己正方同三角組合配合唔同方位，有好大學問。玩無雙嘅人，就係咁以為自己好閃得，騎住隻白馬，縱橫於AI 之間；玩無雙嘅人，唔跌落馬已經覺得好L勁，因為已經比起細個玩《吞食天地》時，成熟咗好多。

就係咁，自欺欺人，一玩十幾廿年，所以初玩《仁王》時嗰下衝擊，沉船到無法形容！

講到尾，點解寫呢篇文呢？其實係想大家珍惜時光。原來玩慣無雙，打《仁王》時，見到隻屍爬起身，都會驚到把槍吊吊揈；你只能夠正方三角、正方三角，然後咁就無精，無精點算？﹗無雙無教過喎，嗰一下，我不自覺咁按咗一下圓形，諗住掃場⋯

浪費咗咁多青春落無雙，先搞到今日咁田地，背後中一箭，已經好L驚，原來跳落樓，真係會跌死，本人《仁王》都60Level了，裝備刷到進度最update，都仲係未打爆機，剛剛過到中國篇，往後仲要等森麻大人幫打，陰公！

唔想有後輩重蹈覆轍，到發現心態反應變慢進化唔到成為新類型人時，就已經太遲；所以無雙已死，仁王當立。