有買 Switch 嘅朋友，最近應該忙於射墨魚，或者你好有心咁睇完《友誼炎上 Overcooked》篇文之後玩緊煮飯仔……不過，無論係之前嘅 Mario Kart 又好，而家嘅 Splatoon 2 都好，都係主打連線競技嘅遊戲，如果有時想靜態少少，以下落黎介紹呢個遊戲，唔知會唔會引起你嘅興趣？

Tequila Works & Cavalier Game Studios 製作嘅《The Sexy Brutale》今年 6 月出喺 PS4 平台時似乎好少人留意，不過曾經製作《魔界戰記》《深夜迴》等遊戲嘅「日本一Software」就認為遊戲相當有潛力，於是引入遊戲再喺日本國內進行推廣，公司剛剛仲宣佈要將遊戲移植埋落 Switch 添！

❖ 故事背景 ❖

英式大宅 Sexy Brutale（個名有啲膠）每年都會舉辦面具舞會，而參加舞會嘅賓客都係仔細挑選過的超級 VIP。咁因為要服侍班 VIP，所以大宅入面嘅管家都受過專業訓練，會對主人同賓客嘅說話唯命是從⋯⋯

玩家嘅身份係一個宣教士，受邀黎到舞會；點知大宅入面居然發生咗殺人事件！究竟兇手係邊個？原因又係咩呢？你以為你大把時間慢慢查？唔係架！因為半夜 12 點前搵到兇手嘅話，時間就會即刻時光倒流，回到命案當日嘅中午，所有嘢就要重新洗牌黎過了。

❖ 遊戲系統❖

雖然話係小品遊戲，但係遊戲喺系統以及視覺上面嘅製作都非常用心；佢嘅 3D 視覺仲令到我有種玩緊森林家族咁嘅錯覺添（喂）

森林家族錯誤玩法（圖片來自漫畫家 片倉真二 Twitter）

無論係場景抑或角色，遊戲都做得非常立體，雖然就咁睇好似 Q 版圓碌碌咁，但係咁樣唔代表粗糙啊！無論係燭台燈光、角色頭髮顏色會隨住光影流動而出現陰影變化等等細節，都令我好驚喜：明明呢隻係 Indie Game 黎，居然都做得咁細緻！

玩家視角：由上至下去探視大宅

英國貴族一向好鍾意喺屋企整間遊戲室，遊戲都有還原呢一點

可唔可以用最快時間衝關固然係遊戲嘅一大挑戰，不過，你搵到嘅線索份量以及你個人嘅判斷力，都會影響到遊戲嘅結局架……因為結局並不只有一個！多結局發展嘅設定，令到個遊戲嘅可玩性提高咗好多！

命案發生之後要搵哂所有人落口供（誤）

主要流程就係搵線索

記得睇住時間做人

時光倒流嘅起始地方係大宅中嘅教堂

推理去到中途開始會有危險，必要時要匿埋吖！

收集到嘅證物同證據都可以事後睇返重整案情

唔知大家睇完介紹會唔會有啲興趣呢？日本 Fami 通方面就比遊戲好高評價（平均分 8 / 10 分），仲將佢列入 2017 年「ゴールド殿堂入り」，所以認真唔嘢小！

遊戲嘅正式發售日子預計係 2017 年8 月 配信決定；日本 Nintendo Store 販售價為 2160円（税込）目前未知係咪同步對應日英語版，但因為個 Game 本身係英文嘅，所以美版 Nintendo Store 正常黎講都會有埋既。