光榮旗下遊戲《不思議鍊金術士》系列不知不覺已經迎黎 20 週年，呢個喺日本家傳戶曉嘅系列，隨住遊戲今年年初開始推出中文版之後，喺香港嘅玩家都慢慢增加咗（雖然我係咩 Game 都堅持玩日文版嘅…）

《不思議鍊金術士》系列一向出名出得快出得密，新作《Lydie & Soeur》話咁快有新消息，日文版預計將於 2018 年冬季上市，根據光榮近年作風，應該好有可能會推出埋中文版 (・ω・)

註：《菲莉絲的煉金工房 不可思議之旅的煉金術士》已於 2017.01.19 推出中文版

Lydie & Soeur 遊戲概念圖

【故事大綱】

新作《L&S》主打雙主角模式，兩位主角 Lydie（リディー）及 Soeur（スール）嘅父親係著名嘅鍊金術師，兩人雖然想以父親為目標，仲想開一間全國最勁嘅鍊金術舖頭！夢想聽落就宏大啦，但係由於雙子缺乏經驗，所以經常撞板……

左：Lydie；右：Soeur

擁有強烈牽絆的雙子姐妹

直至有一日，雙子機緣巧合下拾取到一幅神秘嘅洋畫，仲發現可以進入畫中嘅世界進行探險。

【遊戲系統】

簡單黎講，《L&S》同以往嘅《不思議鍊金術士》系列大綱大致相似，都係講緊主角如何成長嘅故事，不過唔好因此誤會佢係千篇一律呀！呢個系列一向正能量爆燈，其實玩落都幾治癒的遊戲系統融合「探索、戰鬥、鍊成、支線任務」四部份元素，要認真玩爆哂所有嘢都要花心機的。

【探索】

探索有時間限制，左上角可以見到早午晚三個時段變化；舊作玩法入夜就要返屋企，而根據返今次個設定，可能入夜會強制離開「畫中世界」都唔定……無理由可以喺幅畫入面露營回體力啩？唔返屋企嘅主角爸爸會鬧架（喂）

探索過程中可以收集素材。舊作入面，可以收集嘅次數以及素材獲得份量係會受主角嘅等級影響，唔知今集會唔會沿用設定？

【鍊成】

遊戲中最花時間嘅部份！因為解任通常都係要你鍊啲嘢出黎，但等級唔夠又鍊唔到、或者唔夠戰鬥力去打怪刷素材，所以呢部份係一個好大嘅坑 (ﾟдﾟ)

日常探索同戰鬥中可以得到素材，另外隨住劇本推進，玩家會隨機獲得「活性化 Item」可以令鍊成過程得到變化，隨時可以越級鍊到啲隱藏勁道具出黎！

【戰鬥】

今集繼續係 ATB（Active Time Battle）戰鬥系統；兩位主角一位拎槍，一位拎雙手杖，即係一個做前攻，一個做後衛咁解！就咁聽落戰鬥方面應該好易過關；除此之外，仲可以即席喺戰鬥中進行鍊成製作魔法或道具。

雖然戰鬥中途蹲低摘草個畫面真係好好笑（喂）

戰鬥係 2 人1 隊，最高上場人數係 6 人……咦？即係話除咗兩位主角之外，仲會有其他可操作角色未登場噃！

隨住等級上升會開放戰技同法術

【場景設定】

《不思議鍊金術士》系列一向投放大量心思去設計人設同場景，今集都唔例外！以下係官方部份場景設定圖，繼續走中世界架空城鎮風格，鍾意呢個 Setting 嘅朋友應該覺得好吸引。

實體應用落遊戲之後變得更具幻想風

【中文版？】

同埋頭先都提過，上集都出咗中文版啦！而今集係 20 週年「集系列之大成」嘅紀念作喎，無理由唔出中文版嘅！對於好多唔係極擅長打日文 Game 嘅朋友黎講，呢一點應該值得期待吖？始終啲素材名呀、支線任務呀，唔熟日文嘅真係會睇到一舊雲架嘛！

遊戲目前公佈將同步登錄 PS4、PSV、Switch 三個平台，三個平台都各自會推出普通版、Premium 版以及 20 週年紀念版；而 PS4 同 PSV 之間係咪支援 CrossSave 目前我都未肯定！所以有詳細嘅中文化以及產品消息我再同大家匯報啊 (・∀・)