《無夜國度2～新月新娘～》喺 08.31 嘅時候推出日文版，中文版就即將喺 10.26 上市；遊戲整體系統極易上手，如果唔主張稱霸全支線、淨衝劇情嘅話，其實好快可以爆到機。以下係我《無2》二周目後嘅少少感想，考慮緊入手遊戲嘅朋友可以參考一下（笑）

故事大綱係承接第一集《無夜國度》（不過無玩過都絕對跟到個故事）主角係巫女護衛，一次護送行動中，不敵遊戲最終 Boss「月之女王」，結果世界陷入「永遠的黑夜」入面；而主角身受重傷，本應死亡，但被教廷改造成「半妖」，變成「攻擊力提昇，不過活動時間有限制」嘅戰士 LOL

故事重心就係：成為「半妖」嘅女主角能否擊敗「月之女王」呢？

改造成「半妖」後的女主角

遊戲好大部份係戰鬥為主，戰鬥風格同一般無雙遊戲極為相似（咁光榮出品嘛…）不過喺無雙斬斬樂嘅玩法上面，《無2》都仲有 add on 好多唔同嘅元素，例如係主角與同行角色嘅好感度越高，就越容易出到合作技咁樣。

戰鬥界面簡潔炫麗

至於角色自己本身嘅招式，雖然玩家可以喺戰鬥中切換武器，不過唔同武器針對唔同敵人時，其實都無話有啲咩明顯嘅攻擊力加乘作用……所以戰鬥對我黎講嘅樂趣係：睇主角們出特技時啲華麗過場動畫 LOL

就算較高難度，都只不過係雜魚變得厚血咗而已，唔會因此難打咗……好事黎嘅，輕鬆 Play 可以快手衝劇情嘛～

角色嘅合作技各有不同

百合配對也是遊戲重要元素之一

升級就唔難嘅：完成支線、或者殺得多怪，都會結算成升 Level 嘅經驗值

升 Level 同時會獲得 Ability Point 開技能（例如加攻擊力、加 HP、或者其他有利玩家進行探索嘅元素）

遊戲另外一個好花時間嘅部份係「好感育成」！同重要角色係咪可以升滿好感度，會影響最後行 Good End 定係 Bad End 架，所以「好感度」呢一 Part 可以話喺主線之一黎。

我原來以為呢一部份有啲選項揀吓對話咁，不過原來只要完成角色指定嘅支線，就可以升到好感度，咁……又係嘅，畢竟《無2》係動作型 RPG 而唔係 AVG LOL

藍色標誌代表有好感度 event 發生

不過講就易，因為主角係「半妖」，咁佢每次出去探索都有時限，而每次出去亦只可以揀一個隨行角色，無得話「上個角色用剩咗啲時間，所以返據點換人」咁樣；所以……

要培養好感度嘅角色有 6 個咁多，而每個角色都有 10 個以上嘅支線要做，我覺得「如何完美分配時間」去做主線＋角色支線先係《無2》最難玩、最蝦人嘅地方 LOL

每離開一次據點，就扣一日時間

至於遊戲中嘅「式神系統」，我就覺得有少少晝蛇添足了。十幾隻式神入面，得四隻真係有用嘅（探索時清除路障）；而佢地嘅戰鬥力嘛……去到後期，你集中升一兩隻就當然勁啦；但如果無刻意培訓嘅話，式神喺遊戲入面只係純粹嘅 Collection Orz

用式神清除冰屬性路障

你想像下，十幾隻喎，要做好多支線，先拎到技能點幫佢地升 Level；升爆 Level，又要轉生，Total 要轉 5－10次 LOL！鬼唔知練到咁，隻式神就會勁咩，但問題係「升級式神」需要嘅時間，同埋遊戲入面咁趕嘅時間觀念不成正比吖嘛！

結果我拉搵齊啲式神就算了orz

最後呢一部份我有少少失望架，少少咁多啦 orz！據點明明有大泳池，連遊戲 Trailer 都成日以角色著住泳衣喺呢度發生嘅場景黎做招徠！結果呢！

玩家只可以喺呢度換造型架咋！啲造型仲要係特典，唔比錢就無架！咁做咩啫！比個泳池我做咩啫！嗚呀！我原本以為可以約其他角色黎玩水增加好感度之類……結果基本上每個角色只會喺泳池出場一次咁多 orz

簡單黎講呢度只係大型更衣室

隨住劇情推進，會開放更多場所

因為《無2》有結局分歧，所以想知道哂全部劇情真相嘅朋友，建議你跑二周目喔！

有心機跑哂支線嘅，可以解鎖埋第一集主角！

我自己就用咗幾晚時間去二周目呢個遊戲，老老實實，一周目時我感覺還好，輕鬆玩沒負擔，只不過，重覆進行「殺怪解支線」呢個動作，玩到中盤會覺得略嫌單調；慶幸二周目時，技能點同道具有得繼承返，而且可以 Skip 動畫同已經睇過嘅劇情，咁二周目時好快就完成咗了～

結局分歧都幾大落差，但我其實鐘意 Bad End 多啲

最後 Boss 打月之女王

不過，華麗同埋流暢嘅遊戲畫面係要讚嘅，以日系 3D 風格黎講，《無2》做得相當唔錯吖！遊戲出品工作室「GUST」主打美少女風格，而呢個遊戲的確多多少少都有以女角色們嘅性感做賣點，不過角色造型、皮膚模組都做得尚算自然，例如胸部陰影唔會為咗強調大小而刻意造到勁反光等等（笑）

Switch 版畫面，同我 PS4 見到嘅畫面喺質感上好似有少少唔同

整體上我對遊戲嘅評價都仲係唔錯的 ♥ 有興趣嘅朋友記得準時入手啦！

遊戲同時對應 PS4 / PSV / Switch 三個平台，不過目前只有 PlayStation 平台會出繁體中文版，Switch 玩家要注意一下喔！