【十個趣】NS將推出「紅白機 Joy-Con」 單獨睇正正常常 插落機身就……

懷舊風盛行,官方都順應民意,曾經推出復刻版迷你紅白機、迷你超任,黎到今日 Nintendo Direct 直播就話比大家聽最新搞作就係「紅白機手制樣 Joy-Con」!除咗日版紅白機之外,仲有美版灰機手制樣 Joy-Con,就咁睇相絕對非常之靚仔,但係當插埋落部 Nintendo Switch 度……咦!?

 

就咁睇真係幾靚仔,而且個制仲跟返舊 Size,拎上手應該都舒服

留意 2P 制係無 + 制

包裝盒都非常靚仔

呢個就係插落 Switch 既樣……

仲有美版灰機制

 

其實呢隻 Joy-Con 主要係針對 Nintendo Switch Online 提供既紅白機懷舊遊戲下載服務所設計,所以個 Size 都盡力跟返舊機,而佢亦都支援藍牙無線連線。預定於 9 月 19 日新服務開始時就開放埋比玩家訂購,定價 5980日元,當然插落去咁既樣……我就算買都係留返係屋企用算。

 

 

另外由 9 月 19 日開始,Nintendo Switch 玩家要使用線上連線等服務,必需加入 Nintendo Switch Online(NSO)先可以使用,同 PSN Plus、Xbox 金會員類似。而係今日既 Nintendo Direct 上面亦有詳細介紹加入 NSO 之後會享有咩服務,主要有以下幾樣:

 

 

可與朋友進行遊戲連線對戰、共同遊玩功能

 

紅白機懷舊遊戲下載服務

加入 NSO 之後將可以使用紅白機懷舊遊戲下載服務,官方會持續贈送免費懷舊遊戲 ,而係影片入面見到有初代《薩爾達傳說》、《Doctor Mario》、《魔界村》、《孖寶兄弟 3》、《Gradius》、《熱血高校》等等,而呢啲遊戲將會加入線上對戰及共同遊玩功能。

 

雲端儲存遊戲存檔

加入 NSO 之後,玩家終於可以將 Save 放上雲端,就算部機有事要拎去換都唔洗再擔心要由頭玩過啦,屬超重要服務!

 

Smart Phone App 語音通訊 

使用官方 App 可以同好友進行遊戲及語音同話,亦都可以透過 App 去查詢及分享自己既遊戲資料、戰績等資訊。

 

加入者限定特典

加入 NSO 將會有「加入者限定特典」,不過具體係乜暫時未知。

 

至於收費價格如下圖:

日本版 Nintendo Switch Online 月費為 300日元、3個月 800日元、12個月2,400日元。另外仲有家庭 Plan,最多8人共享,價格為 12個月 4,500日元,有朋友既用呢個會平好多。

 

最後提提大家,盡量使用日版或者美版 Nintendo Switch Online 服務,原因?你懂的!

 

麻生龍

麻生龍 中二病廢中,打機會自己講野自己笑,鍾意睇機械人動畫。目前巨噬細胞推。

追蹤

更多文章