【遊戲感想】沉淪・貪戀與執著《秋之回憶 8:Memories Off -Innocent Fille-》系列最終章糾結而扭曲

 

自 1999 年開始嘅戀愛文字遊戲《秋之回憶(メモリーズオフ)》系列,黎到 2018 年,終於走進最終章第八集,同時將系列更名為《告別回憶》。

無錯,呢個遊戲系列,從此就成為玩家的回憶了。

今次寫嘅最終章《メモリーズオフ -Innocent Fille-(告別回憶 -無垢少女-)》,故事上可以話係完全獨立於前作嘅故事,所以玩家就算無玩過前作,都唔怕會跟唔上劇情,只係你會對部份出場嘅角色少咗份激動而已。

例如今集女主角嘉神川諾艾爾,有玩過《Memories off 6》嘅朋友喺見到遊戲公佈嗰一剎那,應該已經叫左出聲,因為其實諾艾爾喺第 6 代已經出過場,當時佢係作為其中一位可攻略角色「嘉神川克羅艾」嘅妹妹登埸的。

時間飛逝,當年嘅克羅艾係高中三年級嘅學生會長;黎到今集《Memories Off 8》裡面,諾艾爾都長大得亭亭玉立,成為高中一年級生了。

 

2005 年《メモリーズオフ6 〜T-wave〜》的嘉神川克羅艾

2018 年《メモリーズオフ -Innocent Fille-》的嘉神川諾艾爾

 

前話說完,故事又如何呢?

 

 

當你無玩過任何一代前作,相信心水清嘅網友,喺睇過《秋8》嘅宣傳海報、網上文案或者遊戲 Trailer 之後,應該都會馬上明白到,呢個遊戲絕對唔會係「後宮囉,追女仔囉」咁膚淺嘅純萌向故事。

劇本共有 15 個結局,如果你玩完一周目,覺得故事平平凡凡,想棄 Game?少年,你一定是太不了解戀愛 AVG 遊戲的運作了。

 

 

二周目才是劇本真正的開始。

一周目劇本是「Light Side」路線,無論你先攻下女主角嘉神川,抑或壽奈櫻,劇本都偏向輕鬆路線。「嘉神川和壽奈櫻」之所以為劇本的「Light Side」,係因為佢地嘅問題,相比劇本嘅「真相」,簡直平凡得不值一提。

「Light Side」圍繞住嘉神川在名門女校裡面遭受欺凌的故事,而開心果壽奈櫻,明明很喜歡嘉神川這個朋友,但係由於欺凌嘉神川嘅同學,其實係自己在校內所屬的小團體;因為怕自己受牽連,因為怕事,所以壽奈櫻只能眼白白看著嘉神川在校園裡面痛苦。

「Light Side」所講的,就係佢地兩位少女纖細嘅情感與想法,以及玩家飾演嘅男主角「累」,可以點樣幫助嘉神川解決校園欺凌嘅問題。

 

 

平平無奇的故事,對吧?

因為「嘉神川和壽奈櫻」喺遊戲入面,正正代表著作品名字嘅「無垢少女」;而男主角累,無論選擇嘉神川抑或壽奈櫻,都係一種「告別回憶」嘅方式:你選擇了未來,你選擇不再擁抱著過去活下去。

然而,有「Light Side」,就有「Heavy Side」。

一周目「Light Side」通關之後,重新開始遊戲的話,就會發現故事初始的對白不一樣了。

今集男主角楠瀬累一開始以「交換生」身份來到湘南高校,除左佢本身成績好可以做交換生之外,另一個主要原因,係受到喺湘南高校就讀嘅兩位舊朋友邀請:三城莉一以及三城柚莉。

莉一及柚莉係攣生兄妹,亦係累小時候於北海道嘅青梅竹馬,但係「青梅竹馬」並唔止佢地三個,仲有一位,係三城家另一位孩子,三城琴莉。三城家有嚴重家暴問題,後來一次「意外」,造成火災,累無法救回琴莉,結果,琴莉死了。

本身是三城家大家最愛的一份子,亦是累兩情相悅嘅對象;琴莉死後,大家心中,各自留下不可磨滅的痛苦回憶;而以上並唔係劇透,呢一段劇情係遊戲一開始就會透露比玩家知道嘅故事背景;至少,大家認知中嘅事實係咁樣。

你開左「Heavy Side」路線就會明白,事情的真相,以及在真相背後的「真相」,既扭曲,亦痛苦,根本同一個「開心快樂愛情後宮系」故事相差千里。

 

 

由於我好想大家玩呢個遊戲,所以劇情最重心的部份,我就唔劇透了。

簡單黎講的話,無論係《秋之回憶》抑或近年更為大家所知嘅《白色相簿》系列,日本出色而經典嘅戀愛 AVG 遊戲,重點通常離不開「抉擇」:留在過去抑或邁向將來、沉淪抑或自我解放。你可能會話「講咁多咪又係三角戀要二揀一」,OK,理論上是正確的,不過各位可攻略角色喺遊戲裡面,其實亦都各自有另一種含義喺入面。

今集故事劇本安排都幾令我驚訝的,我係有少少強逼症嘅玩家,一定會將遊戲全部結局路線都玩哂;咁又咁啱得咁橋,我幾乎係順次序爆逐個 Ending,一步一步咁接近劇本真相。

琴莉是否真的死了、在累面前不斷出現那個琴莉的身影又是誰?
陌生人可以信任嗎?一直信任的人就不會背叛嗎?

 

 

如果係本身唔抗拒玩戀愛 AVG 遊戲嘅朋友,呢隻《告別回憶 -無垢少女-》,我是真心推薦比各位,佢嘅劇本,一定唔會令你後悔。如果你有幸玩過之前七集,今集更加不可以錯過。作為系列「最終回」,遊戲最後的 Hidden End 可以話係回憶 Fans 向大放送。

例如是《Memories Off 1》就已經登場嘅浪子(?)稲穂信,今集化身 Cafe 店長,亦喺咁多年故事之後,終於搵到佢嘅歸宿,而咁多代《Memories Off》嘅女主角亦都有以配角方式輪流登場在遊戲裡面,例如:

《Memories Off 1》主角今坂唯笑,正式同當時的男主角三上智也訂婚了;
《Memories Off 2》主角白河ほたる,唔止搵返水樹奈奈客串配音,仲已經成為國際知名演奏家了。

 

當年的天才鋼琴家白河ほたる

呢張 CG 應該係好多 Fans 玩呢個遊戲最開心嘅一幕(!)

 

今次遊戲難得地有繁體中文字幕對應,不過唔知係咪太多對白嘅關係,去到「Heavy Side」嘅路線時,字幕偶爾會有「全部簡體」或者「中日文夾雜」嘅問題。

 

 

我同時擁有遊戲的 PS4 版以及 Switch 版,不過 Switch 版的字幕問題似乎比 PS4 版稍為良好一點,加上大家如果追開劇情應該會好想一氣呵成玩落去,所以同時有兩個機種的朋友,可以考慮入手 Switch 版方便攻略喔!

綜合評價的話,我白金今集之後,好有衝動想由第一集開始玩返成個《秋之回憶》系列,雖然部份作品有移植到 PSP/PSV/手機上面,不過要搵齊咁多集重玩一次都似乎有點難度……。

玩到我想從頭玩返個系列,說明呢個遊戲絕對有吸引力!LOL
好希望本身對文字作品唔抗拒嘅朋友,睇完呢篇感想之後,會勾起你攻略遊戲的興趣喔。

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。首本個人塔羅散文今年書展上架:shorturl.at/iDMWY

追蹤

Facebook 更多文章