呢個年代，我地記得香港比外星人、怪獸或者機械人大肆破壞嘅電影，來來去去唔係《悍戰太平洋 (Pacific Rim)》就只係《變形金剛4：殲滅世紀 (Transformers: Age of Extinction)》。早喺六七十年代，邵氏其實已經拍過唔少呢類以香港做背景嘅科幻奇情特攝片！大家最記得一定係《香港大災難(台：戰神 / 大陸：關公大戰外星人)》同李修賢嘅《中國超人》。而講到破壞力驚人就一定係 1977 年嘅《猩猩王(The Mighty Peking Man)》，為救愛人單拖由銅鑼灣打到落中環，爬埋上當年全港最高嘅康樂大廈。 (迷之聲：明明就King Kong喎)

講到咁梗係想介紹隻《猩猩王》相關嘅玩具比大家啦！Play 呢間玩具公司嘅 10 吋搪膠系列，除左日系動漫特攝角色，喺上年亦推出第一個邵氏官方授權電影角色《中國超人》，原色版當然就一早賣晒，而第二彈嘅《油鬼子》前排都開左預訂，而嚟緊仲有以下介紹由 Play x Unbox Industries x Celestial Pictures’ Shaw Brothers Universe Film Library 合作嘅經典電影系列《猩猩王》！

話得猩猩王就梗係大隻啲，13 吋高嘅身型，夠晒份量

面相表情就以 Play 向來風格，將角色作品再漫畫化少少

雖然搪膠公仔好多都冇關節，但玩具係要拎嚟玩架嘛，所以《猩猩王》嘅頸、雙臂、雙腕同腳腕都有可動部份，比大家擺靚靚

手掌腳掌嘅紋理都冇偷雞

講得可以擺靚靚，就點都有啲配件嘅！一條爛石柱同女主角阿維

FILMART SUPREME THE MIGHTY PEKING MAN VINYL FIGURE 猩猩王搪膠公仔預計下年第一季先出貨，有興趣嘅就去返 Play 嘅官網度訂啦！

猩猩王搪膠公仔預購傳送門

(拍攝：蕭若翹)