【同原作一樣咁好玩】《Resident Evil 2 – The Board Game》遊戲簡介及試玩後感

早前推出嘅熱門重製大作<Resident Evil 2>,令大家重燃對生化危機嘅熱愛,晚晚匿喺屋企打喪屍!但係一個人打,打得多都會覺得悶啦!想同其他朋友一齊盡情打喪屍,就要試下呢款由CAPCOM授權,桌遊版本嘅<Resident Evil 2>!

講到明係正式授權,還原度當然極高!成個遊戲唔計DLC(即係Expansion),已經有八個情景,連William Birkin第三型態、G-Mutant都有得打!每個情景大概都要玩足一個鐘, 除咗滿地喪屍,仲成日會有突發事情,一個唔小心,就可能性命不保 !

就算係實物都好靚㗎!

 

 

講完有咩敵人可以打,咁我哋究竟可以用咩角色去打先 ?答案就係四位主角!Leon、Claire、Ada Wong同埋武器店老闆Robert Kendo!

四個角色各自有唔同嘅技能,例如Claire可以幫隊友回血、Ada可以無視突發事件等等。四個人需要互相合作,完成每個場景嘅目標並令所有人逃離版圖, 先至叫做過關!只要有任何一個角色死亡,都會Game Over!而喺冇 save point 嘅 Board game 入面,又要由頭嚟過㗎喇!

每個角色嘅技能,已經喺角色卡上面清楚列明,所以唔使擔心會唔記得。

另外,大部分嘅遊戲元素都準確呈現喺呢款 Board game 裏面。例如有一啲門,要先搵到鎖匙先至開到、要執彈夾幫你加子彈、越難入去嘅地方就會有越強力嘅武器、背包格數有限等等。

起手子彈得15粒,每消耗一粒子彈就可以擲多一粒攻擊骰,但好多時都唔可以命中喪屍,而且喪屍又有咁多隻,真係要謹慎使用!因為彈匣唔係隨便可以拎到 !

係咪好熟悉嘅生命值圖表呢!每比喪屍咬一下就會跌一格,有啲特別喪屍仲會一下子跌兩格!跌到落去Danger以下就會死㗎喇!

怪物出現注意!觸發某啲事件就會係咁生怪!到時要避開佢哋又更難啦!

而我自己最鍾意嘅一個特點,就係攻擊嘅部分!因為粒攻擊骰不但有攻擊,仲有迴避,而且只有一面係可以殺死喪屍,好多時攻擊都會變左迴避,就好似遊戲入面,當你想攻擊嘅時候,太緊張唔小心變左迴避一樣! (笑)而且由於子彈有限,基本上你係殺唔死所有喪屍,唯有不斷扭臭佢哋,係咪同遊戲好相似先!

只有左面嘅圖案可以殺死喪屍,就算擲到右邊都只可以令喪屍後退一步(表示常常都只有右邊T_T)

呢啲就係常常出現嘅迴避面啦!根據唔同喪屍嘅數量你需要擲到唔同嘅迴避圖案!

遊戲規則我就唔多講喇,因為我主要係想同你哋分享呢隻遊戲有幾好玩!

就Board Game既難度嚟講,呢款<Resident Evil 2>屬於易學難精,即使係冇咩接觸Board game嘅朋友,都可以輕鬆上手~ 加上代入感非常之強,節奏亦明快,就我試玩經驗嚟講,可以話係一隻得分頗高嘅遊戲!但係如果你想完美通關,可能就要同你嘅隊友花多啲心思,諗下點樣用最短時間攞到最多資源,同埋點樣避開啲喪屍啦!

 

官方介紹:https://www.kickstarter.com/projects/steamforged/resident-eviltm-2-the-board-game

 

米拉

米拉 來,給我一輩子,我要和桌遊談一場糾纏不清的戀愛。

追蹤

更多文章