暴雪註冊商標文件又露端倪 佐證 Netflix 即將開拍《Diablo》影片

暴雪係唔少機迷心入面都有特殊既地位,佢既作品亦都陪住唔少人成長,當中又以《Warcraft》同《Diablo》系列最得人心。之前既《Warcraft》電影雖然評價麻麻,不過作為 Fans 既我都入場睇咗三次支持,話晒等咗咁多年終於有電影嘛!而上年已經傳緊《Diablo》都會拍成影片,不過大家都當佢吹水,點知最近因為一份暴雪註冊商標文件,意外地佐證成件事真確性!

 

 

根據外媒 Blizzardwatch 既報導,早前係美國專利及商標局網站上公開既一份的商標申請文件,透露 Blizzard Entertainment 係 3 月 8日時註冊咗新商標「DIABLO」,而呢個商標係用於電影或電視的製作與發行,同時仲標明「可供下載有關遊戲的敘事電影及影片及可透過視頻點播服務提供」,加上呢堆註解,而又有能力拍影片 / 電影既,好似指向緊一間公司……。

 

 

無錯,呢間公司就係 Netflix。

係上年已經有傳過 Blizzard 會同 Netflix 合作拍攝《Diablo》劇集,當時既爆料文章仲透露會由「Hellboy」編劇 Andrew Cosby 操刀,並且已經進行緊相關工作,不過大家上年焦點都係隻手機 Game 上面,無乜人認真留意到呢單野。

 

呢隻 Game :o)

 

呢單料爆出黎之後,Andrew Cosby 曾經係 Twitter 上面就透露自己就《Diablo》影片分別同 Activision 及 Netflix 進行最後磋商,而且仲會係動畫黎。之後佢自己都應該 Feel 到瀨野,所以好快就刪咗條 Tweet,不過網絡既野又點會無人留底,加上刪 Tweet 呢個行為咁此地無銀,成件事更加真實。

 

 

雖然 Blizzard 仲未正式公布,不過呢單野都八九不離十。最重要既係佢無強行將《Diablo》真人化,選擇製作動畫,絕對係聰明既做法!如果大家有印象,之前同樣由遊戲改編既動畫《惡魔城》,質數之高有目共睹,反而令人更期待《Diablo》動畫既來臨。

 

 

五木

動漫電玩宅,極愛金田一系列,擅長動作及策略遊戲

追蹤

更多文章