早前同大家討論過「破戒僧」嘅身份同埋背後故事，今次就同大家分享《隻狼》裡面另外兩隻強敵（？）嘅隱喻。

相信好多玩家喺遊戲序盤已經初遇白蛇，當時大家除左走佬應該都無其他選擇（笑）；而玩家於葦名城下過左菩薩谷嘅水池、以及喺葦名底部分別都會遇到嘅白色獅子猿，到底呢兩個敵人同故事有咩關係，點解會出現喺《隻狼》裡面呢？

宮崎英高喜愛引用典籍傳說以融入故事，所以，無論白蛇抑或獅子猿，都同日本嘅信仰文化有好大關係。

對唔住大佬，你見我唔到

首先講顏色。

日本人一向認為白色代表不受污染、出塵、高貴，所以佢地相信「白蛇」呢種罕見嘅動物，於地方上出現係一種好事，例如佢會代表地方繁盛；所以白蛇以及獅子猿之所以會以白色形象出現，可以理解為「佢地同為葦名國人嘅信仰」，係一種神化嘅存在。

不過，信仰還信仰，信佢令你繁盛係一回事，但係玩家亦都心知肚明，葦名國勢已一落千丈，沒落之際，見此「保國勢昌隆」嘅白蛇，其實相當諷刺。

咁但係既然係「神」，又何以令人懼怕？咁又要講下「白蛇神」以及「猿神」嘅由來。

因為佢地前身，根本就係妖怪黎。

【獅子猿】

題外話：日本有位作家名為 水木 しげる老師，佢之所以出名，係因為佢對日本神怪以及傳說有深厚研究，如果你都對呢方面故事有興趣，可以去書局搵呢本書黎睇～

「猿神」本來係妖怪，出處係日本經典故事《猿神退治～早太郎傳説》。

故事背景，就係古時某條山中村莊，每年都要為「山神」獻上幼女生祭，如果唔係，就會農作失收。後來，一名僧人經過村莊，認為「神就唔會食小朋友啦」，於是前往「山神」居處探聽，點知除左見到一大班馬騮，仲見到一隻大猩猩，赫然發現，原來大家所害怕嘅「神」，係一隻巨形馬騮！

傳說中嘅「猿神」，你睇下幾 Cute？

呢班馬騮唱歌，原來佢地好驚「早太郎」，仲話早太郎出現自己就會死；於是僧人回村一問，先知早太郎係一隻大狗。

結局，就係僧人帶住早太郎入山，狗狗奮而咬斷大猩猩喉嚨，「山神」死去，其他馬騮亦作鳥獸散。

呢個故事，係「獅子猿」嘅其中一個起源，最後，「猿神」死喺一隻大型犬手上。

呢一個故事係咪亦可以部份解釋，點解《隻狼》裡面「金剛山 仙峯寺」有咁多少林寺十八銅人同埋馬騮呢？

【白蛇】

雖然時至今日，日本人仲係將「白蛇」視為神、福物，山口縣仲有一間以信奉「白蛇」而聞名嘅岩國神社，不過，白蛇神話起源，其實與上面提到嘅「猿神退治」故事類似。

同樣地，相傳日本遠古時代，喺阿依努村（即而家北海道）每晚都有一條「長七丈、闊三米」嘅白蛇出黎於村中橫行，破壞佢地農作物，於是村民頭痛亦恐懼，唔知點算好。呢條白蛇就話，要每年農曆八月十五日為佢獻上「十二歲稚女」作為糧食，就可以保佢地村莊平安。

數年過去，一位少女挺身而出，話自願做祭品，但佢帶同武器以及佢嘅一條巨犬，趁白蛇不為意時，將白蛇斬殺擊倒。村人為左紀念呢件事，亦同時怕白蛇會化作怨靈，於是將白蛇生前居住嘅洞穴加以祭祀，後來發展為神社。

而家喺日本新潟縣，就有一間著名神社叫作「白龍大権現神社」，白龍即對白蛇嘅尊稱，講嘅就係以上嘅故事；同樣地，喺北海道，每年七月，有一節日叫「白蛇公主節（白蛇姫まつり）」，在父母陪同下，兩位十二～三歲少女，圍著「白蛇」跳舞。睇黎呢個故事對日本人的確有深遠影響。

白蛇公主祭，圖片來源自北海道觀光局

【犬】

睇到呢度嘅朋友，或者會發現兩個故事裡面嘅「神」，都有一個下場，就係「比犬殺死」。《隻狼》，狼其實亦都係大型犬科動物，當然個遊戲叫《隻犬》或者《隻狗》又真係好無氣勢（開玩笑 LOL），不過有理由相信宮崎英高有考慮到「犬」呢個要素去思考點樣安排遊戲中嘅怪物。

為左寫呢篇文章，參考左好多日本傳說以及神社故事 orz
唔知會唔會加深你對遊戲嘅興趣呢？

相關文章：
【劇情討論】《隻狼 SEKIRO》源之宮「破戒僧」真身原來係……