由日本一開發嘅《致全人類（じんるいのみなさまへ）》原定於 2019 年 5 月 30 日發售，不過官方為咗「進一步提昇遊戲品質」，於今日較早時份宣佈遊戲將會延期發售，新發售日為 6 月 27 日，對應平台為 PS4 以及 Nintendo Switch。

《致全人類》係一隻求生遊戲，故事講述女主角「榛東 京椛」以及四位女性朋友結伴到秋葉原觀光；但係，佢地一覺醒來，赫然發現秋葉原以及成個東京，居然變成一片荒土，於是五位主角開始左求生之旅。

雖然話係求生，不過遊戲走輕鬆甚至治癒風，五位女主角之間嘅情誼帶住淡淡百合味道，亦係遊戲賣點之一；同時，大家見慣見熟嘅秋葉原，於遊戲中變成廢棄都市，JR 車站變到叢林咁，相信對玩家黎講都係一大樂趣。

主角們隨住探索地圖，需要不斷轉換據點，亦需要收集食材同埋其他道具去維持生命，所以「食譜」同埋「烹調」都係遊戲重點！同埋一班女主角嘅心情、夠唔夠瞓、健康都需要玩家好好管理。

唔好理求生點解可以求得咁囂張，日本一出品嘅遊戲好似一向都有少少超現實同埋離地……作為今年少有嘅治療風日系小品遊戲，根據日本一以往作風，相信遊戲稍後時份亦會就繁體中文版公佈更多消息。

到底延期一個月後遊戲會提昇品質到一個咩地步，就讓我們拭目以待。