【影視新聞】加拿大戲院《神探 Pikachu》場次播錯鬼片!試計算小朋友心靈陰影面積

 

繼北美以及香港之後,電影《神探 Pikachu》亦已經陸續於唔同國家上映。作為一套合家歡類型電影,相信除左 Fans,亦會有好多家長帶埋小朋友入戲院睇毛茸茸比卡超,希望帶比小朋友開心回憶,之但係……

假如你一心入場諗住睇喜劇,點知佢播錯恐怖片,你會點?

加拿大一家戲院於 5 月9 日就擺出一個大烏龍,適逢係最多小朋友入場嘅早場《神探比卡超》,平時我地睇戲,咪會有一堆 Trailer 睇嘅?呢間戲院喺電影開始之前,已經播左一套恐怖片嘅預告片,令到場入面嘅小朋友好不安;好不容易睇完 Trailer,大家滿心歡喜,諗住《比卡超》馬上要出場嘅時候,戲院,播錯呢一套:

 

 

香港嘅讀者們或者會覺得呢張海報相當眼熟,因為呢套《The Curse of La Llorona(哭泣的女詭)》於今年 4 月19 日已於香港上映,係著名恐怖片導演溫子仁(James Wan)今年最新力作,故事講一個被老公背叛嘅女人,將兩個仔浸落河殺死之後再投河自盡,佢嘅怨念成為詛咒,然後女主角就比佢嘅惡靈纏上……

比卡超變成怨婦,如果喺香港,呢間戲院一定會比人投訴到上哂報、啲父母一定會扯哂火;不過,加拿大啲父母反應就相當正,佢地見到班小朋友目瞪口呆,居然係全場人一齊哄堂大笑!居然無人覺得要掩住小朋友對眼!

 

 

戲院員工稍後時份發現播錯戲,拿拿聲中斷鬼片、改返播《神探 Pikachu》;不過,呢個錯誤已經成為外國網友網上熱話,大家都傾向認為「睇比卡超遇上播錯鬼片呢種意外,係一種人生彩蛋」咁話!唔通外國人真係比較幽默?

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章