【VJG 食評】迎來一周年《第五人格》x 沙嗲王主題餐廳・白咖哩好味依舊仲送高質周邊

 

非常受玩家歡迎嘅「非對稱對戰型」手機遊戲《第五人格》眨下眼已經開始營運一周年,香港網易為左隆重其事,同本地食肆連鎖店「沙嗲王」合作推出聯乘主題餐廳(詳文可以參考這裡),除左沙嗲王分店內部佈置滿《第五人格》圖素以及角色圖樣外,沙嗲王仲為今次合作特別推出一系列主題餐點。

我地編輯部好榮幸得到香港網易邀請去食返餐,飽到用左兩日黎消化(喂)以下係我地嘅匯報!

 

活動開始第二日係暑假開始,旺角分店早就坐滿人

暑假剛開始,見到唔少小朋友組團黎食《第五人格》餐(仲有比小朋友夾住黎嘅家長)

現場有角色立牌供 Fans 影相留念

收銀機都有佈置!

 

今次主題餐廳同「沙嗲王」合作,價錢平民化,分店多,所以現場見到唔少年輕人同埋小朋友組隊黎食。

白咖哩、香茅豬扒、沙嗲湯底等菜式,一向係沙嗲王嘅招牌,所以呢幾樣野,今次亦都放左落合作菜式入面。

相信好多朋友都有食過「主題餐廳」,但係好多時啲食物質素「貴夾唔抵」,有時仲要幾難食。不過,放心,今次《第五人格》主題菜式,同平時嘅沙嗲王食物水準一樣,只係喺擺盤上面別具心思。

 

   

 

本 Menu,好靚,可惜係非賣品。

香港網易同事同我地分享,原來「沙嗲王」負責美術位同事,本身都係《第五人格》忠實玩家,所以今次可以為主題餐廳負責美術設計,位同事聽講非常開心,連菜單入面,都模擬返遊戲裡面嘅操作界面。

大家點菜時記得成個菜式名讀出黎,夠哂中二!

至於餐點種類共六種;飲品則為八種。我地編輯部一行人,一坐低,好豪氣咁同侍應講,「全份 Menu 同我黎一份!」嘅感覺,真係好爽,大概係六月以來第一次感到「爽快」。

 

     

 

 

味道方面,同平時食嘅沙嗲王維持一樣水準,部份菜式會喺送到客人桌上時,會隨餐附上「米紙」一張,比客人自己 DIY 選擇擺位;咖哩汁亦會分開放上,比客人自行調教份量。

因為點選《第五人格》餐點會隨機送上特製書簽,所以建議各位搵多兩位朋友一齊黎食,咁就可以拎多幾張!

書簽唔係平時主題餐廳送嘅紙製版,而係用上膠片製作,圖案超精美,同埋數量限定,編輯部取得一份完整版本作實物拍攝,多謝沙嗲王。

 

 

用膠片製作一來係方便 Fans 收藏,二來,其實係為左同一系列飲品配合。今次嘅八種飲品,代表八個角色(如上圖示),到底大家可唔可以抽到自己想要嘅角色書簽去同飲品配對,就好睇大家手氣啦!

 

編輯部當日一人飲兩枝!

 

現場仲有兩款限量 A4 膠文件夾,只要點選一款第五人格主題餐點或飲品並惠顧滿港幣$ 100 (加一後)即可以港幣 $ 29 換購一個。

 

 

今次活動係期間限定,食物質素同價錢都係合理範圍,各位《第五人格》Fans 請即刻組團去食沙嗲王啦。

好多學生而家開始放緊暑假,或者,今年嘅暑假對於好多學生黎講,已經唔可能再單純地淨係玩、淨係飲飲食食;但係,我地作為大人,始終都希望啲年輕人該休息時休息,食飽飯先有力量做正事,食飽飯先可以一齊走下去呀。

重申:白咖哩係好味嘅!

 

宣傳主圖

 

【第五人格一周年 x 沙嗲王主題餐廳】

地點:沙嗲王全線 10 間分店
日期:由 2019 年 7 月 10 日到 9 月 9 日(油麻地分店營業至 10 月 9 日 )

活動相關文章:
【PR】《第五人格》營運一週年!即日開始聯乘「沙嗲王」搞主題餐廳

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章