今年 8 月 20 日時，因為 Disney 同埋 Sony 傾唔掂數，所以決定將「蜘蛛俠」從《復仇者聯盟》中抽起；但係要知道蜘蛛仔係 Tony Stalk 指定嘅復仇者接班人，《復仇者》無左佢，大家都唔知故事會點。

不過，喺一片哀號聲中，Disney 同 Sony 兩間公司日前就宣佈，大家繼續合作，蜘蛛仔有 Sony 拍嘅獨立電影，同時亦會出現喺 Marvel 嘅《復仇者》系列入面。消息一出，各界 Fans 當然表示振奮，不過開心嘅同時，今次兩大公司破冰再合作，飾演 Spider-Man 嘅 Tom Holland 原來居功不少！

根據外媒 The Hollywood Reporter 嘅報導，呢位 23 歲嘅演員，喺「傾唔掂數」事件發生之後，多次主動去與 Disney CEO Bob Iger 以及 Sony 主席 Tom Rothman 見面，去爭取兩間公司改變主意。

其實，喺 8 月 20 日後，Tom Holland 曾經出席 Disney D23 Expo 活動，並喺台上引用 Tony Stalk 著名對白「I love you 3,000」黎回應 Fans 們嘅熱烈反應，而網路上亦出現左「＃SaveSpiderMan」嘅 Hashtag 連鎖，希望兩大巨頭再度合作。

Tom 本身亦係 Sony 黎緊另一電影《Uncharted》嘅演員之一，所以佢率先拜訪 Sony 主席 Rothman，然後亦都非常勇氣可嘉地，主動去聯絡 Disney CEO Bob Iger，一位於荷里活屬於教父級嘅人物，多次來回洽談之下，成功令兩大巨頭再次重啟合作方案。

其實對於電影公司黎講，合唔合作主要係講緊利益問題，今次傾掂數後，到底雙方於票房收益上面點樣分配，目前我地就無清晰嘅資料。不過，可以肯定嘅係，《Spider-Man》獨立電影仲會繼續拍落去，而 Spider-Man 呢個角色，亦會喺 MCU 電影裡面登場至少一次。

各位 Fans 一邊等待下集《復仇者》嘅同時，都真係要多謝 Tom Holland 今次爭取主動呀！