【遊戲新聞】玩完癲鵝又到癲鹿《DEEEER Simulator》控制其他動物將警察 KO

 

獨立工作室 NASPAPA GAMES 即將在 Steam 平台上推出名為《DEEEER Simulator(非常普通的鹿)》嘅新遊戲,早前介紹過 《Untitled Goose Game》比玩家化身癲鵝搞搞震,而今次呢隻《DEEEER Simulator》就比玩家變身做隻癲鹿,喺城市入面任意玩。

不過,介紹得比大家又點會只係「做鹿探索」咁簡單,呢隻遊戲嘅過癮之處,就係玩家飾演嘅鹿,唔單止可以兩腳步行做隻大力鹿周圍搞破壞,仲可以操控其他動物去征服呢個都市!

 

 

當然你想得罪其他動物,同佢地打爭飽都係你嘅選擇,不過要達成征服城市嘅願望,都係不割蓆、大團結比較好,事關《DEEEER Simulator》同《GTA》有一點好相似,你搞事搞得多,啲警察就要出黎維持治安(維持治安嘅叫警察,相反嗰啲就大家心照啦)

 

牛奶反地心吸力噴射器!!!

 

玩家如果比警察捉到就 Game Over,但係如果你嘅戰力或者動物兵團夠勁,就可以開火同佢地對戰,叻豬嘅仲可以 KO 埋佢地,成功稱霸呢片土地!

 

 

遊戲預計 2020 年 1 月 21 日就會於 Steam 平台發售,目前正進行早期遊戲體驗,遊戲界面對應繁中、英、日語,有興趣嘅玩家可以去佢地嘅 Steam 頁面望下。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章