【遊戲新聞】克蘇魯主題精神獵奇遊戲《WORLD OF HORROR》極有伊藤潤二風格 2 月登場

 

雖然香港近年嘅情況已經好夠痴線,但係,如果你想脫離現實、感受下二次元嘅恐怖,或者係想鍛鍊下自己嘅精神力嘅話,今次介紹呢隻遊戲,可能好適合你。

由獨立遊戲工作室 panstasz 開發嘅《WORLD OF HORROR-》係一隻克蘇魯主題嘅 AVG 恐怖遊戲,畫面呈現充滿伊藤潤二嘅風格,於 2020 年 2 月 20 日在 Steam 平台上開始先行體驗。

 

 

《WORLD OF HORROR》以 1980 年代日本某個沿海城鎮為舞台。一直相傳城鎮郊外有邪神,某天開始,住民慢慢失去理智,而城鎮裡面開始有異型徘徊;假如城鎮所有人都陷入瘋狂,邪力就會繼續散播,令世界陷入滅亡。

玩家飾演城鎮住民,為左阻止呢件事發生,你必須四出查證。每當聽到一個恐怖傳言,你就要去睇下發生咩事,從而獲得「得知真相」嘅線索。

 

 

不過,玩得克蘇魯又點可以無 SAN 值,不過遊戲中就稱為 Doom 值,當你越接觸得多恐怖事物,Doom 值就會上升,當 Doom 值達到 100% 玩家就 Game Over 了。

 

 

遊戲除左探索,仲會有回合式戰鬥,玩家嘅能力仲會有隨機嘅可能性;所以玩家要活用探索期間收集到嘅道具,去避免死亡。異型嘅造型就非常伊藤潤二,仲揉合左部分日本都市傳說嘅恐怖故事,例如係剪刀裂嘴女、漩渦無面男等等。

 

 

遊戲以黑白復古風格製作,連音樂都模仿 Indie 遊戲嘅 16 bit 音樂,於氣氛營造上令玩家有一種莫名嘅不安感!編輯部對遊戲十分期待,鍾意恐怖遊戲或者克蘇魯主題嘅你,又會唔會考慮入手呢?

遊戲目前只對應英語版本。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章