類惡魔城 2D 動作遊戲多年來一直有唔少 Fans，繼早前大獲好評嘅《Dead Cells》之後，獨立遊戲工作室 Big Blue Bubble 亦即將推出高難度遊戲《Foregone》。

遊戲於 2020 年 2 月 28 日已於 Epic Store 早期販售，但係唔想用 Epic Store 嘅朋友，唔緊要，因為遊戲亦預計於 2021 年正式登錄到 Steam 平台上面，官方亦放口風，話會考慮埋登錄家用機平台如 Nintendo Switch。

《Foregone》嘅舞台世界名為「Calagan」，係一個擁有高科技嘅先進城市；然而，有敵對國家為左搶得呢個技術，所以不斷對 Calagan 發起攻擊。為左守護 Calagan，名為「Arbiter」嘅戰士站上前線，去對抗名為「Harrow」嘅敵對軍團。

遊戲中嘅武器以及敵人種類極多，敵人除左有近攻槍劍，亦會有大型兵器及陷阱。至於玩家一路攻打地圖，就會隨住擊敗敵人而獲得新嘅能力以及武器，係非常典型嘅「類惡魔城」遊戲模式，只不過今次嘅《Foregone》多左一份科幻嘅要素。

遊戲中場景極多，有森林、遺跡、城市等等設定，亦會有隱藏地圖需要玩家探索；地圖裡面亦會有各種機關，需要玩家解謎通過，除左動作技巧，同時考驗玩家嘅觀察力同智慧。

玩家初期武器配備為「短劍」與「手槍」，遊戲中並無防具設定，所以面對敵人攻擊，必須有技巧地迴避，或者係睇準時機，從後伏擊敵人。

擊敗敵人後，會隨機掉落藥水、技能點、錢等等各種有利戰鬥嘅道具；份強力敵人仲會掉落新武器，例如係弓箭、大劍，而每樣武器亦可能會有各自嘅附加能力，例如係攻擊力提昇、防禦力提昇、或者係予敵人麻痺效果等等。

不過，玩家可以同時持有嘅道具數量有限，所以必要時都要作出取捨。

至於技能樹方面，玩家都可以視乎自己嘅遊玩方式，去選擇解鎖邊啲技能點；因為技能樹有分支，玩家未必有能力全個技能樹稱霸，所以到底要攻擊力先決、抑或係加強生命值，呢一點全由玩家決定。

以下宣傳影片為 Epic Store 早期販售專用，重申，遊戲 2021 年會正式登錄 Steam，PC 玩家們可以先期待一下。