【遊戲介紹】三人合作外星殺敵 《Outriders》實機遊玩影片令人滿意

喺七月果陣 SQUARE ENIX 公開一隻三人合作遊戲《Outriders》,當初俾我嘅感覺係好有《Destiny》、《Anthem》味道,但係鑑於《Anthem》呢個前科,一日未有實機都係未敢跟車太貼。日前官方就正式放咗條長達 26 分鐘嘅實機遊玩片段出黎,效果令人滿意。

 

 

《Outriders》由 People Can Fly 製作,屬於 FPS 式角色扮演遊戲,採用第三身視點,最大支援 3 人 Co-op。遊戲以黑暗未來世界為背景,地球已被破壞至不適合居住,人類已經遷移至「Enoch」星球,但呢個星球都逐漸暴向滅亡,於是三位「Outriders」就出發尋找新嘅人類居所。

 

 

就咁睇故事背景就好大陣《Anthem》味,不過根據製作團隊之前接受外媒訪問,唔會好似《Destiny》、《Anthem》咁,上市後先慢慢推出更新去令隻遊戲變得「完整」,而係一開始已經係一隻完整嘅遊戲,令玩家可以享受當中每個細節,話晒都已經開發咗四年。

 

 

《Outriders》可供玩家自訂屬於自己嘅角色,包括大量嘅槍械、裝備改裝。遊戲提供四種職業,當然係對應唔同位置及技能樹,例如有負責補血、有建造定位炮台嘅、有用盾做坦的,配合各職業技能殺敵,都頗有玩 MMORPG 感覺,最重要嘅係睇片唔覺得有伏!

 

 

《Outriders》預計於今年內推出,對應平台為 PS4 / PS5 / Xbox One / Xbox Series X / PC(Steam & Epic),另外 Google Stadia 版本預計於 2021 年上市。

 

五木

動漫電玩宅,極愛金田一系列,擅長動作及策略遊戲

追蹤

更多文章